Melissa vaska seg til blods – no blir det enda enklare å få hjelp

– Hendene mine hadde opne sår, dei var blå, tørre og vonde heile tida.

I fleire år hadde OCD fast grep om 27 år gamle Melissa Amaro.

Etter fire dagar med intens behandling på Førde sentralsjukehus, har ho vore frisk i fem år.

Tøff eksponeringsterapi er metoden i behandlinga som hjelper pasientar med både sosial angst, panikkliding og OCD.

Det verste var for det beste

Melissa forklarar at ho alltid var klar over at den overdrivne grundige vasken ikkje var bra, eller nødvendig.

Daglegdagse oppgåver som å vaske hendene eller dusje tok gjerne 40 minutt.

Sjølv etter ein grundig vask måtte ho få hjelp av kona til å kle på seg fordi ho tenkte hendene hennar var ekle.

Melissa berre måtte gjere det.

Når ho kom i behandling vart ho tvinga til å utfordre seg sjølv.

– Eg måtte trene hjernen på nytt. Eg måtte gjere mange ting som eg syntest var det skumlaste i verda.

For Melissa betydde det å ta på skitne klutar, ekle dørhandtak og hoppe over vanleg handvask.

Store deler av landet

Før 4-dagars behandlinga kom i 2011 måtte pasientar få behandling over to månadar til faste tidspunkt.

Sidan har det skjedd ei stor utvikling. Tilbodet er no rulla ut i store deler av helse-Noreg.

Mellom anna Otta og Kongsvinger er blant dei åtte stadane som startar den suksessfulle behandlinga.

– Det er akkurat dette som trengst. For nokre fungerer ikkje lange behandlingar, for andre er det einaste svaret, seier leiaren av organisasjonen Mental Helse, Ole Marius Minde Johnsen.

Mellom 80–90 prosent er friske eit år etter behandlinga viser studiar som er gjort i Bergen, Oslo, Molde og Førde.

Johnsen blir glad når han høyrer om Melissa og at det i hennar tilfelle fanst rett type hjelp i nærleiken.

Likevel meiner han det er eit stort problem at ein ofte kuttar i tilbodet for psykisk helsehjelp.

Ein livsvarig jobb

Fem år etter behandlinga er Melissa framleis del av den gode statistikken, og lever ein enklare kvardag.

– Eg må framleis jobbe litt med meg sjølv, men eg er trygg på at eg skal halde meg frisk.