Meiningsmåling: Over halvparten av amerikanarar er imot bølga av tollsatsar

Meiningsmålinga kjem kvelden før USA trappar opp handelskrigen med Kina, ved å innføre til saman 104 prosent toll på kinesiske varer.

Der svarte 73 prosent av deltakarane at dei ventar at daglegvarene deira kjem til å bli dyrare gjennom det neste halvåret. Nesten ingen trudde det motsette.

Godt over halvparten av deltakarane, 57 prosent, sa dei var ueinige i dei nye tollsatsane, som gjeld nesten alle land i verda. 39 prosent svarte at dei var einige.

Deltakarane var omtrent delt på midten i partitilhøyrsle.

Nesten alle blant republikanarane sa at dei var einige i at «kortvarig økonomisk smerte er verdt å gjere USA sterkare på lang sikt». Nesten alle demokratane var ueinige.

Svara blei samla inn på tvers av ei rekke delstatar gjennom helga, og konkluderte på søndag.

– Ganske sjølvstendig

Mange kinesarar som AP har snakka med i Beijing, seier dei blei overraska då Trump auka tollen.

Men dei fleste som nyheitsbyrået møtte, trudde ikkje at dei vil merke det i kvardagen.

– Eg meiner at landet vårt er ganske sjølvstendig no, sa ein innbyggar, som berre vil identifiserast som Wang.

– Dei har kanskje ikkje ein vesentleg effekt på kvardagen vår, men dei kan påverke nokre selskap som driv med import og eksport.

Etter at den første tollen blei annonsert, svarte Kina med same mynt – 34 prosent.

– Vi, kinesarane, er ikkje bråkmakarar. Men vi vikar ikkje når det blir servert bråk, seier talspersonen for landet sitt utanriksdepartement, Lin Jian.

Analytikarar meiner at Kina ikkje har noko å vinne på dette, reint økonomisk. Kina eksporterer tre gongar så mange varer til USA enn det landet importerer derifrå.

Handelskrigen kjem også på eit tidspunkt der den kinesiske økonomien går sakte, eldrebølga er på veg inn over landet, og det er vanskelegare for unge å få jobb.

Seier mange land vil forhandle

Det kvite huset seier tysdag kveld at USA har blitt kontakta av nesten 70 land som vil starte forhandlingar om tollsatsar.

Talsperson Karoline Leavitt seier ifølge Reuters at Donald Trump har bede administrasjonen sin om å jobbe med «skreddarsydde avtalar» til desse landa.

Vilkåra, ifølge Leavitt, er at dei verkar til fordel for amerikanske arbeidarar, og gjer noko med det Trump ser på som kroniske handelsubalansar.

Ekspertar som NRK har snakka med avviste sist veke talgrunnlaget som dei nye tollsatsane er baserte på.