Må på fleire oppdrag: Skuldar på elbilar

– Det vi drar mest ut på om sommaren er startvanskar og punkteringar.

Det fortel bilbergar Chris Espeland (24) i Bilberging Innlandet.

For det har vore ein auke i antal oppdrag for punkteringar dei siste åra. Og ein av grunnane er faktisk den store auka av elbilar i landet.

I 2024 var det for første gang fleire elbilar enn bensinbilar registrert i Noreg.

Nye tal frå NAF Veihjelp viser at nesten 30 prosent av utrykkingane til elbilistar er skulda av punktering i 2024.

Tilsvarande tal for bensin- og dieselbilar er 11 prosent.

Og det er fleire grunnar til at elbilar toppar punkterings-statistikken.

– For det første er elbilar ein del tyngre enn vanlege bilar. Og då er det lettare å punktere.

Det fortel Nils Sødal, kommunikasjonsrådgivar i NAF.

Bilbergar Chris har tidlegare jobba på dekkverkstad. Han har sett at store elbilar har slitne dekk, mykje på grunn av tyngda.

– Er ein ordentleg uheldig, kan ein elbil slite ut eit sett med dekk på ganske kort tid.

• Les og: EU kan innføre reglar om årlege EU-kontrollar på bilar som er eldre enn 10 år.

Alt eller ingenting

NRK fekk bli med bilbergar Chris frå Bilberging Innlandet på Rudshøgda ut på oppdrag. Denne gong var det ikkje punktering, men ein bil som ikkje ville starte.

– Det er så varierande frå dag til dag.

Chris, som tidlegare har jobba på dekkverkstad, har sett det meste når det gjeld punkteringar.

– Det er mykje forskjellig som er ute på vegane. Dekk som eksploderer, som losnar frå felgen og alt mellom.

Mange faktorar

Men det er ikkje berre tunge elbilar som gir fleire oppdrag.

– Dei fleste nye biler har ein veghjelps-avtale i 3–5 år, og då er terskelen for å ringe etter hjelp ein del lågare, fortel Mikkel Skullerud i Viking.

Nils Sødal i NAF peiker òg på at nesten alle nye bilar i dag ikkje blir levert med reservedekk, slik det vart før.

Ifølgje Motor var det i 2020 berre sju bilmodellar som vart levert med reservedekk som standard.

Det som har erstatta reservedekket, er eit reparasjonssett. Då kan førarane sjølv fylle på ein slags væske som tettar holet i dekket.

Men den er det mange som kvir seg for å bruke, ifølgje Sødal.

– Eg trur fleire og fleire heller vel å ringe etter veghjelp enn å prøve seg på desse reparasjonssetta. Og så trur eg kanskje folk ikkje er like sjølvhjelpne i dag som før.

Espeland er einig i at desse reparasjonssetta ikkje er berre-berre å bruke.

– Det er nesten slik at ein skal ha flaks for å få dei til å fungere.

Mykje ein kan gjere sjølv

Men kva kan ein gjere for å unngå punktering?

Bilbergar Chris har fleire råd.

– Berre det å sjekke dekka sine ein gang i månaden for sprekker, slitasje og lufttrykk, kan auke levetida ganske kraftig. Og etterstramme mutterane samtidig.

Lagringa av dekk har og ein del å seie.

– Vask dekka og felgane når du tar dei av, og lagre dei på ein tørr plass med lite temperaturforskjellar. Ein betongkjellar er heilt perfekt.