Kyle droppa eksamen: – Eg trong rett og slett å kvile

– Kyle, er du klar for eksamen på måndag?

Spørsmålet kom like før finalen i årets Eurovision Song Contest, laurdag.

– Den trong du ikkje nemne. Eg får berre ta det som det kjem, svara Kyle Alessandro.

Men med lite søvn og ein sliten kropp etter innsatsen i Eurovision valde Kyle å ikkje møte opp til munnleg eksamen i faget politikk og menneskerettar, slik han hadde planlagd.

– Det blei ikkje eksamen likevel! Eg trong rett og slett å kvile, seier artisten til NRK.

– Det einaste fornuftige å gjere

Like før midnatt, natt til måndag og munnleg eksamen, kom han og Kyle heim til Steinkjer etter Eurovision.

– Eg spurde ein siste gong før han gjekk og la seg: Skal du på skulen i morgon? Og då sa ha rett og slett nei.

Det seier far og manager, Kioto Villalobos Sanchez, som var med sonen til Basel.

– Eg støtta han i avgjerda. Det var eigentleg det einaste fornuftige å gjere.

For etter ei intens helg med lite søvn i Basel trong Kyle, som hamna på 18.-plass i Eurovision å kvile.

– Kyle var sliten, rett og slett. Han skjønte det sjølv, at det var liten vits å møte opp i dag, legg faren til.

Og på grunn av deltakinga i Eurovision måtte 19-åringen også stå over eksamen i norsk hovudmål og psykologi.

Vil satse vidare på musikk

Noreg og Kyle Alessandro blei nummer 18, med totalt 89 poeng i årets Eurovision-finale.

– Det er betre enn sisteplass, og det er betre enn oddsen også, seier Kyle Alessandro om plasseringa Noreg enda på.

Etter finalen seier 19-åringen at han føler seg heldig som har fått oppleve å vere med i årets Eurovision-finale.

No skal han og faren sette seg ned for å finne ut kva vegen vidare er for den unge artisten.

– Han har definitivt lyst til å halde fram med ei musikkarriere, og det inneber veldig mykje, seier far og manager.

Etter Eurovision har det fleire dører opna seg både i Noreg og i Europa for Kyle Alessandro.

– Han må ta stilling til om han skal velje dette som karriereveg og då begynne å teikne ein liten strategi på kva veg den karrieren skal ta, legg faren til.

Finn ei løysing på eksamen

Rektor ved Steinkjer videregående skole seier at skulen skal gjere sitt for at Kyle Alessandro skal få til å fullføre skulegangen.

– Me må legge ein plan i lag med han og så må me følge regelverket for eksamen, seier Liv Karin Olsen Flak.

Ho rosar eleven og seier han bidreg til eit godt læringsmiljø både i klassen og på heile skulen.

– Me føler oss sikker på at Kyle skal få fullført skulegangen på ein god måte.