Israel trappar opp angrepa i Gaza: – Situasjonen er katastrofal

Minst 58 palestinarar har blitt drepne i angrep i Gaza i løpet av natta.

Ei rekke personar er framleis fanga under ruinane etter luftangrepa, ifølge lokale helsemyndigheiter.

– Situasjonen inne på sjukehuset er katastrofal, seier direktøren ved det indonesiske sjukehuset i Nord-Gaza til nyheitsbyrået Reuters.

Det siste døgnet har 153 personar blitt drepne, medan 459 skadde har blitt tekne med til sjukehus. Det skriv helsemyndigheitene i Gaza på Telegram.

Sidan torsdag er minst 300 personar drepne, rapporterer helsemyndigheitene. Det er ein av dei dødelegaste periodane sidan våpenkvila kollapsa i mars.

Fanga under ruinar

Dei fleste angrepa har vore retta mot Nord-Gaza.

Kvinner og barn er blant dei mange drepne, ifølge ein talsmann for Gazas helsedepartement.

Al Jazeera melder at det framleis går føre seg redningsarbeid fordi ein har høyrt rop frå personar fanga i ruinane.

Sivilforsvaret i området seier at angrepa trefte sivile bygningar nord på Gazastripa. Det er også meldt om bruk av røykbomber og israelske stridsvogner i byen Beit Lahiya.

Trappar opp angrepa

Det israelske militæret (IDF) seier at operasjonane deira i Gaza fortset, blant anna med bakkestyrkar.

Seint fredag kveld bekrefta IDF på meldingstenesta Telegram at dei er i ein «innleiande fase» for å ta kontroll over fleire område i Gaza.

– Vi førebur utviding av operasjonar for å oppnå målet med krigen, inkludert lauslating av gissel og oppløysinga av terrororganisasjonen Hamas, heiter det i utsegna.

Tysdag denne veka sa Israels statsminister Benjamin Netanyahu at dei i løpet av få dagar ville gå inn i Gaza med «full styrke for å overvinne Hamas», og at «ingen kan stanse dei».

Åtvarar mot etnisk reinsing

FNs menneskerettssjef Volker Türk reagerer etter angrepet fredag som tvingar menneske på flukt, samtidig som det kjem truslar om intensiverte angrep.

Han uttrykker djup bekymring for det han beskriv som etnisk reinsing.

– Det står fram som eit forsøk på å presse fram ei permanent demografisk endring i Gaza. Det strir mot folkeretten og kan karakteriserast som etnisk reinsing, seier Türk i ei pressemelding.

Han fordømmer eskaleringa av angrepa mot Gaza og ber om global handling for å stoppe at fleire blir drepne.

– Vi må sette ein stoppar for denne galskapen, seier Türk.

Interessert i utanriks? Høyr den nyaste podkast-episoden til redaksjonen: