Iranske statlege medium: Stor eksplosjon på ei av landets største hamner

– Eksplosjonen skjede i ein del av hamna Rajaei, og vi er i gang med å sløkke brannen, seier hamneleiar Esmaeil Malekizadeh ifølge TV-kanalen.

Kanalen melder vidare at fleire personar er skadde og frakta til sjukehus for behandling.

Det er førebels ikkje kjent kva som forårsaka eksplosjonen, eller om nokon har døydd. Bilete frå staden viser tjukk svart røyk som stig mot himmelen.

Straumnettet i området er ikkje skada, seier Det nasjonale oljerafinnerings- og distribusjonsselskapet i ei utsegn.

Bandar Abbas ligg om lag tusen kilometer sør for Teheran. Rajaei-hamna er ei av landets største, og ligg ikkje langt frå Dubai i Dei sameinte arabiske emirat.

USA og Iran fortset atomsamtalar

Laurdag er det venta at USA og Iran skal forhandle vidare om ein mogleg atomavtale i Oman, melder AFP. Samtalane er inne i sin tredje runde.

USA si spesialutsending Steve Witkoff og den iranske utanriksministeren Abbas Araghchi leiar diskusjonane, men skal også denne gongen ha med seg tekniske ekspertar.

Amerikanarane vil at Iran skal slutte å utvikle atomvåpen, mot at USA lettar på dei svært avgrensande sanksjonane.

Aragchi har denne veka uttrykt «forsiktig optimisme» om forhandlingane.

– Dersom USA sitt einaste krav er at Iran ikkje har atomvåpen, er kravet mogleg å oppnå, sa han.

Det iranske statlege nyheitsbyrået IRNA melder at berre ein dag med samtalar er planlagt, men at dette kan bli utvida ved behov.