Drapet på Breonna Taylor: Ekspolitimann dømd, men ikkje for å ha drepe henne

Taylor (26) sov i senga si saman med kjærasten då politiet gjekk til aksjon mot bustaden deira 13. mars 2020.

Kjærasten har forklart i retten at han trudde det var eit innbrot, og at han difor skaut mot inntrengarane.

Politiet svarte med å fyre av 32 skot, og Taylor blei drepen, melder BBC.

Brett Hankison skaut ti av skota inn i leilegheita. Han er ikkje kjent skuldig i drap, men for å ha «krenka rettane» til Taylor ved å bruke for mykje makt.

Dommar Rebecca Jennings følgde ikkje anbefalinga frå Trump-administrasjonen, som var at Hankison skulle få sleppe fengselsstraff.

Det er sjeldan at justisdepartementet grip inn i saker som dette.

Likevel føreslo det at dommen skulle svarar til den tida Hankison allereie hadde sete inne, som var éin dag i samband med at han blei arrestert.

Den lengste dommen ein kan få for denne tiltalen er livstid.

Takksame for fengselsstraff

Familien til Taylor møtte pressen etter at rettssaka var konkludert.

Bistandsadvokat Ben Crump sa at dei hadde håpa på ein lengre straff, men takka både det tidlegare og noverande justisdepartementet.

– Eg er takksam for den vesle biten av rettferd vi fekk. Det var definitivt ikkje det eg hadde venta, sa Kenneth Walker, kjærasten til Taylor.

– Brett Hankison sa til meg at eg skulle i fengsel resten av livet. Så det får meg definitivt til å kjenne på noko å sjå at han skal dit, sjølv om det berre er i ei lita stund.

Også mora til Taylor, Tamika Palmer, kommenterte dommen.

– Eg meiner at dommaren gjorde det beste ho kunne med det ho hadde å jobbe med, sa Palmer.

Ingen tiltalte for drap

Til saman har fire politifolk blitt kopla til hendinga, ifølge New York Times.

4. august blei dei alle føderalt tiltalte for brot på sivile rettar, som å forfalske dokument for å få lov til å raide leilegheita. Ein dommar oppheva nokre av tiltalene i august 2024.

Ein av politifolka, Kelly Goodlette, erkjente straffskuld i samband med dokumentforfalskinga etter å ha pensjonert seg frå tenesta.

Ein annan, Kyle Meany, fekk sparken.

Hankison er den einaste som er dømd for sjølve skyteepisoden. Ingen av dei fire politifolka har blitt tiltalte for å drepe Taylor.