Dei eg er ueinig med, det er fine folk!

Eg får litt vondt i magen. Det politiske ordskiftet i USA har utvikla seg til kallenamn og nedsetjande ord. Før var ein ueinig. No tar ein utgangspunkt i at motstandaren lyg.

DON’T LOOK TO AMERICA: – Eg håpar vi kan ta vare på det norske ordskiftet vårt, slik at det ikkje glir over mot den amerikanske retorikken, skriv Torbjørn Vereide. Foto: Thomas Nilsson / VG

fredag 11. oktober kl. 10:32

<-TORBJØRN VEREIDE

stortingsrepresentant (Ap)

Nyleg hadde eg besøk til Stortinget frå Eikefjord barne- og ungdomsskule.

Av alle ting eg kunne fortelje dei, så var dette det viktigaste: Dei eg er ueinig med, det er fine folk! Vi står i debattar, og vi er ueinige, men dei bryr seg også om å gjere kvardagen betre for andre.

Like etter skulebesøket blir kontrasten diverre veldig stor. Erna Solberg sitt bodskap i debatten går overraskande langt i ei forteljing om kor fælt landet vårt har blitt, og at dei som er ueinige med ho, berre bløffar og lyg.

Eg blir litt lei meg.

KVIFOR SÅ HARD, ERNA? – Eg blir litt lei meg, skriv Aps Torbjørn Vereide. Foto: Javad Parsa / NTB

Likevel vil eg fortelje deg dette Erna: Eg vil fortsette å snakke godt om deg.

Når folk spør meg på tomannshand kva eg eigentleg meiner om deg, vil eg seie kva politiske saker vi er ueinige om, men eg vil òg fortelje dei at mennesket er bra.

Og at du er god på alt av detaljar.

Barn og ungdom ser oss. Og dei lærer av måten vi pratar om andre.

Difor skulle eg ønske at du heller ville fortelje kva du sjølv vil gjere i ditt eige budsjett, i staden for å bruke tida di til å så tvil om oppriktigheten til dei andre partia.

Eg er glad i ein frisk debatt. Gjerne med knallharde argument, litt albue og med glimt i auge. Men eg er redd for den utviklinga vi ser rundt oss.

Difor håpar eg vi kan ta vare på det norske ordskiftet vårt, slik at det ikkje glir over mot den amerikanske retorikken.

Slik at vi kan vere ueinig om saka, men på same tid klarer å huske at dei vi er ueinige med, i botn og grunn er fine folk.