Vil kutte toll for å verne Noreg

– Det framstår no heilt tydeleg at Støre-regjeringa ikkje har vore godt nok førebudde på kva ein ny Trump-administrasjon kunne bringe med seg.

Det skriv Høgre-leiar Erna Solberg i ei pressemelding.

Høgre viser til ein årleg rapport der USA kartlegg handelspolitikken til ei rekke land.

Der har amerikanske byråkratar skrive eit samandrag av norsk tollpolitikk.

Mellom anna skriv dei at Noreg har låg toll på dei fleste varer, men høg toll på landbruksvarer.

Innretninga av den norske politikken fører til at sal av frukt og grønt frå USA til Noreg blir svært vanskeleg, ifølgje rapporten.

– Når vi ristar på hovudet til Trump sin tollkrig, så er det verdt å huske at Noreg faktisk har svært høge tollmurar sjølv. Vi har 344 prosent toll på biff, 191 prosent på nypoteter og 429 prosent på lammekjøtt, skriv Solberg.

– Regjeringa har gang på gang sagt at dei er førebudde på handelskrig, men realiteten er at Støre-regjeringa seinast i fjor auka landbrukstollen mot USA.

Høgre har ikkje stadfesta kva konkrete endringar dei vil gjere i tollpolitikken. I partiprogrammet skriv dei at dei framleis vil ha importvern, men at dei vil gå gjennom og lette tollen på enkelte varer.

Kunngjer tollane i morgon

Utspelet kjem i samband med at Donald Trump har varsla nye tollar mot fleire land i morgon. Trump har sagt at 2. april blir ein «frigjeringsdag».

I dag stadfesta Det kvite hus at Trump vil lansere tollane onsdag klokka 22:00, norsk tid. Tollane vil tre i kraft så snart dei er kunngjort, ifølgje Reuters.

Det er uklart om rapporten, som blei publisert i dag, vil påverke tollane som Trump vil innføre.

Nøyaktig dei same formuleringane som Høgre no trekker fram, har stått i dei amerikanske rapportane kvart år, i alle fall tilbake til 2019. Trump var president i USA også då, medan Solberg var statsminister og styrte politikken her i Noreg.

– Billeg triks frå Høgre

– Eg vurderer dette som eit forsøk på eit billeg triks frå Høgre, seier finansminister Jens Stoltenberg (Ap).

Han er kritisk til at Høgre tek opp emnet akkurat i dag.

– Dette er ein årleg rapport og det som står her er ikkje nytt. No må ikkje vi gi president Trump noko som helst slags unnskyldning for å innføre toll mot Noreg, seier Stoltenberg.

Han seier Noreg har hatt møte med USA på mange ulike nivå for å sikre norske interesser i handelskrigen.

– Føler du at dei høyrer på deg?

– Det er for tidleg å seie. Eg er redd at vi må vere førebudde på at det kan komme toll også mot Noreg i morgon. Men eg trur vi skal avvente og sjå kva som faktisk kjem, seier Stoltenberg.