Ukraina-trening får kritikk – Noreg lovar å skreddarsy

Noreg går no saman med dei andre nordiske og baltiske landa om trening og materiell utrusting av ein ukrainsk brigade.

Det blei kjent måndag under toppmøtet der statsminister Jonas Gahr Støre og 13 andre europeiske leiarar møter den ukrainske presidenten i Kyiv.

Toppmøtet skjer på dagen tre år etter at Russland gjekk til fullskala angrep mot Ukraina.

– Det har vore viktig for den norske regjeringa at bidraga frå Noreg har reell betydning for Ukrainas forsvarskamp mot Russland, seier Støre i Kyiv.

Noreg bidreg allereie med opptrening av ukrainske soldatar i Noreg, Storbritannia og Tyskland. No skal bidraget styrkast.

Sjølv om slike bidrag er ønska av Ukraina, får dei kritikk. Dei mislukkast med å førebu ukrainske soldatar til moderne krigføring i Ukraina, ifølge kritikarane.

Har fått kritikk

For snart to veker sidan blei det bestemt at Ukraina ikkje skal opprette nye brigadar, men fokusere på å forsterke dei eksisterande.

Grunnen er dårlege erfaringar.

Serhij Filimonov, som leier den 180. mekaniserte bataljonen til forsvaret, gjekk laus på svakheitene i opplæring av ukrainske soldatar i utlandet ein kronikk i Ukrainske Pravda 10. januar.

– Dårleg leiing, manglande erfaring og utilstrekkeleg trening har resultert i tap av område, skadd utstyr og tragiske utfall. Nato sine treningsmetodar er ofte ikkje synkroniserte med realiteten i moderne krigføring, skreiv Filimonov.

Sjølv om soldatane blir trena opp med topp moderne utstyr, slit dei med å bruke dei på slagmarka.

– Realiteten i moderne krigføring viser at utanlandsk trening som ikkje er tilpassa ukrainske forhold og korleis avdelinga opererer, er ikkje berre lite effektiv, men farleg.

Skrekkeksempelet han og andre har trekt fram er den 155. mekaniserte brigaden. Dei blei trena av franske styrkar.

Då brigaden returnerte til Ukraina etter trening gjekk han i oppløysing, ifølge The Economist. Forbes skriv at rundt 1700 av dei 5800 soldatane forsvann utan permisjon, nokon til dei tidlegare einingane sine. Rundt 50 skal ha desertert i Frankrike.

I kronikken skreiv Filimonov også at å skyte maskingevær og å kaste granat berre er 10–15 prosent av kunnskapen ein treng. Soldatar må også vere i stand til å kamuflere og sete opp ein posisjon. Dei må også kunne gje medisinsk behandling og skrive rapportar.

– Dette blir ikkje ordentleg undervist i utlandet, påstår han.

Vil skreddarsy

Statsminister Støre er trygg i at støtta Ukraina får frå Baltikum og Norden no er tilpassa behovet i kvardagen i krigen.

– No kjem vi til å gje ein ny type støtte til forsvarsstriden dei står i, nemleg med å investere i Ukraina sin eigen forsvarsindustri. Den er tettast på realitetane i denne kampen, seier Støre.

Han seier at Noreg også er open for å vidareutvikle støtta til Ukraina.

Også forsvarsminister Tore O. Sandvik seier dei har god oversikt over kva Ukraina treng.

– Vi er i tett dialog med det ukrainske forsvaret om kva behova er. Saman med dei andre nordiske og baltiske landa vil vi skreddarsy trening tilpassa Ukraina sine behov, seier han.

Noreg vil også lære av erfaringar som Noreg og andre land har fått så langt, legg forsvarsministeren til.