Sparte 40.000 på å prute ned renta

For mange nordmenn er bustadlån det dei brukar mest pengar på i løpet av eit år.

Kva rente du får frå banken avgjer kor mykje du må betale, og her er forskjellane store.

Andreas Fagerheim betalte over 6 prosent i rente fram til han tok kontakt med banken. Då sette dei renta ned til under 5 prosent. No sparer han over 40.000 kroner i årlege utgifter.

– Kvifor gjorde ikkje du dette før?

– Det er ikkje noko eg likar å drive med. Eg stolte på at banken vil mitt beste. Eg har mykje anna morosamt å drive med, heller enn å sjå på renta, seier Fagerheim.

Passive kundar har høgast rente

Undersøkingar frå Forbrukarrådet viser at passive kundar betalar mest rente til banken.

Det same viser tala til Renteradar.

– Dei fleste kan spare 0,2 til 0,4 prosentpoeng. Det blir fort mykje pengar, seier marknadssjef Sindre Noss.

Dei får stadig rapportar frå kundar som ligg rundt 1 prosentpoeng over dei beste rentene.

Ved NTNU i Trondheim har dei forska på lån i norske bankar.

Funna viser at innvandrarar, barn av innvandrar og eldre har høgast rente.

– Dei som betalar aller mest er dei som har både høg alder og låg utdanning, seier Endre Jo Reite.

Han er fyrsteamanuensis ved NTNU, i tillegg til å vere direktør for personmarknad i BN Bank.

Reite meiner det er på tide med ei opprydding i bankbransjen.

– Eg meiner det er urettferdig at vi tek meir betalt frå dei som ikkje finn fram i digitalt, seier Reite.

– Då vil jo banken tape pengar?

– Ja, då vil vi tape litt. Men vi bør klare oss utan inntekter som kjem frå utnytting av lojaliteten til kundane, seier Reite.

Meiner det er god konkurranse

Bankane har plikt til å oppgi prisar til Finansportalen, men mange kundar får rente som er langt lågare enn listeprisen.

Norske bankar er organisert i Finans Noreg. Dei meiner bransjen fungerer godt i dag, men vegår at enkelte kan ha dårleg rente.

– Det er vel ein fare i alle marknader, at viss du sit stille som forbrukar, så får du ikkje dei beste prisane, seier Tom Staavi.

– Kan ikkje de gi god rente til alle?

– Vi meiner prisane i bankane er ganske gjennomsiktige. Vi er lovpålagde å vurdere kvar enkelt kunde individuelt, seier han.

– Ifølge Finanstilsynet er norske bankar av dei mest lønsame i Europa. Korleis forklarer du det?

– Dette går i bølger. No har vi hatt ein periode der innteninga auka, men det er mange grunnar til det, seier Staavi.

– Bankane bør ta kontakt

Pensjonistforbundet er fortvila over situasjonen og meiner eldre personar blir diskriminert av bankane.

– Bankane bør ta kontakt med kundar som sit med høg rente, seier styreleiar Jan Davidsen.

– Har ikkje dei eldre eit ansvar sjølv?

– Jo, men mange klarar ikkje å ta det ansvaret. Det skjer blant anna fordi dei ikkje er digitale. Då har bankane eit ansvar for å ikkje utnytte dei lojale kundane, seier Davidsen.

Nøgd med den nye renta

No smiler Andreas Fagerheim litt når han snakkar om renta si.

– Det er klart den var alt for høg, seier han.

Banken sette ned renta tre dagar etter at han tok kontakt.

– Eg kan anbefala alle å gjere det, seier Fagerheim.