Solvår (14) og Melina (15) er positive til mobilforbod

– Det blir litt rart, men eg trur det kjem til å gå fint, seier Melina Moussazadeh (15).

Venninna Solvår Løvberg (14) trur mobilforbodet, som Elverum ungdomsskule no innfører, både er positivt og negativt.

– Fordi nokon kan jo for eksempel ha venner utanfor skolen som dei går på. Både nettvenner og venner på andre skolar. Så dei er kanskje litt avhengige i å ha kontakt med dei.

Samtidig meiner ho forbodet kan vere ein bra ting. For utan ein mobil i friminutta, kan dei lettare skaffe seg nye venner ved skolen dei går på, meiner Løvberg.

Solvår Løvberg (14) viser korleis mobilforbodet på Elverum ungdomsskole blir handheva: Ved hjelp av magnetar som opnar og låser mobillommene kvar elev har fått.

Solvår Løvberg (14) og Melina Moussazadeh (15) med kvar sine mobillommer som dei får ha med seg gjennom skoledagen.

Moussazadeh og Løvberg trur det skal gå fint å vere utan mobiltelefonane heile skoledagen.

• Skjermtida blant ungdom har gått ned etter pandemien, men er framleis høgare enn før, melder ungdommane sjølv.

Mange har innført restriksjonar

I februar kom Utdanningsdirektoratet med oppfordringar om mobilbruk.

No har fleire kommunar, blant dei Oslo, Kristiansand og Elverum, innført mobilforbod på alle grunnskolane frå dette skoleåret.

I tillegg har fleire enkeltskolar allereie hatt ulike former for mobilrestriksjonar før dei nasjonale oppfordringane kom.

I ei undersøking som Utdanningsdirektoratet står bak, der nesten fire av ti grunnskolar har svart, melder 96 prosent at dei har innført restriksjonar.

Det frydar kunnskapsminister Kari Nessa Nordtun (Ap).

– Vi får tydelege tilbakemeldingar som viser at mobilfrie skolar får til betre læringsresultat, og dei har gjerne betre trivsel fordi mobbetala går ned.

Ho legg til at ved skolar som har mobilfrie friminutt, er elevane også meir aktive.

– Det er viktig for minnet, konsentrasjonen og evna til problemløysing. Det er vinn-vinn.

Oppfordring, ikkje lovpålagt

Nesten halvparten av dei vidaregåande skolane i Noreg har svart på same spørsmål. Her melder 64 prosent at dei har innført restriksjonar på bruk av mobiltelefonar og smartklokker.

Kunnskapsministeren ønsker ikkje å svare på om det å pålegge eit absolutt forbod gjennom lovverket er aktuelt.

– Det krev mange ressursar, pengar og ikkje minst tid som vi ikkje har.

• IQ-en vår starta å søkke same år som smarttelefonen kom. Det er ikkje tilfeldig, meiner psykolog.

– Blir godt for både lærarar og elevar

På Elverum ungdomsskule er musikk- og engelsklærar Emil Sæternes positiv til innføringa av mobilforbod.

– Om det ikkje er sosiale medium, er det foreldre som ringer, eller andre elevar som har lyst til å ringe. Og ein skal sjekke det eine og det andre.

Han trur forbodet vil hjelpe på konsentrasjonen til elevane.

Melina Moussazadeh (15) fortel at ho til vanleg bruker nesten ti timar på mobilen kvar dag. Ho er likevel optimistisk med tanke på det kommande skoleåret.

– Eg trur det kjem til å gå bra, for eg treng det. Eg kan ikkje ha ti timar i skjermtid. Og eg har jo gode venner eg kan vere med.

Ps! Har skolen din ikkje innført mobilrestriksjonar? Tips oss, da vel!