Skal undersøke om Bye kan sitte i varetekt heime

Frostating lagmannsrett bestemt at 55-åringen skal sitte i varetekt i to veker.

– Det er i tråd med påstanden vår og lagmannsretten er einig i vår påstand, Frode Wisth, Arne Bye sin forsvarar.

Trøndelag tingrett bestemte tidlegare denne veka at Bye kunne haldast i varetekt i fire veker.

Avgjersla blei først anka av påtalemakta, som ønska ni veker varetektsfengsling.

Men då sende Bye sine forsvarar motanke og har no fått medhald.

Adresseavisen meldte om avgjersla frå lagmannsretten først.

Meir om saka mot Arne Bye

Skal undersøke om Bye kan sitte i varetekt heime

I løpet av dei to vekene Bye no skal sitte i varetektsfengsling skal det også undersøkast om den tidlegare kommuneoverlegen heller kan sitte heime med fotlenke.

Då skal det også undersøkast om bustaden til Bye er eigna for at han kan sitte i varetektsfengsling.

I tillegg må dei undersøke om Bye sjølv er eigna til å gjennomføre denne typen varetektsfengsling.

Lova om varetekt med elektronisk kontroll er ny og trådde i kraft 15. august i år.

– Eg registrerer at lagmannsretten ikkje finn grunnlag til å utelukke fotlenke. Men avgjersla seier ikkje noko om kva dei meiner direkte, så det blir opp til domstolen å ta stilling til ved neste fengslingsmøte.

Det seier påtaleansvarleg i saka, Ole Andreas Aftret.

Meiner det vil støyte allmenta si rettsfølelse

Påtalemakta meiner Bye må sitte i varetekt i fengselet på grunn av omsyn til allmenta si rettsfølelse.

– Når han blir pågripen for å takast ut av samfunnet vil ei tilbakeføring til det same samfunnet gjere at føremålet med fengslinga bli forspilt.

Dette har dei argumentert for i fleire fengslingsmøte.

– Påtalemakta meiner det føremålet ikkje blir godt nok ivaretatt med eit opphald i heimen, legg Aftret til.

Påtalemakta har gjeve kriminalomsorga tid til å undersøke om Bye er eigna for varetekt med elektronisk kontroll innan torsdag neste veke.

Eit nytt fengslingsmøte er sett opp til å gå i tingretten fredag 5. september.

– Ekstrem mengde saksdokument

Arne Bye og forsvararane ønsker at han skal få mogelegheit til å førebu seg til ei mogeleg ankesak heime, i staden for i fengselet.

– Det er ei særs spesiell sak med ei ekstrem mengde saksdokument.

Forsvararen seier det krev ein unormal stor ressurs for å førebu seg til ankesaka.

– Eg trur det er nærmare 60 terabyte me skal gå gjennom, legg Wisth til.

I tillegg meiner forsvararane at Bye si sikkerheit ikkje blir ivaretatt i fengselet.

– Ein må nærmast isolere han, legg Wisth til.

Utsett for vald i fengselet

I forbindelse med fengslingsmøtet tysdag blei det kjent at den tidlegare kommuneoverlegen har blitt utsett for vald i fengsel.

– Han har blitt utsett for grov vald, og kor det har vore naudsynt med helsetilsyn, skreiv Bye sin forsvarar, Frode Wisth, til tingretten.

Politiet stadfesta at Bye er fornærma i ei valdsepisode som fann stad i juli.

– Politiet er ikkje kjent med forhold som gjer valden grov. Med atterhald om at det er omstende som ikkje er kjent for oss per nå, fortalde politiadvokat Ole Andreas Aftret.

Har trekt deler av anken

I Trøndelag tingrett blei Bye funnen skulding i 70 valdtekter og 82 tilfelle av misbruk av stilling.

Tingretten dømde han til 21 år i fengsel. Bye har anka dommen.

Bye sin forsvarer, Frode Wisth, har forklart at dei ønsker ei ny vurdering av om kvinnene var ute av stand til å motsette seg behandlinga dei fekk på legekontoret.

Ei eventuell ankesak er førehandsberamma til å starte i Frostating lagmannsrett 28. oktober.

Det er sett av 17 veker til å behandle ei eventuell ankesak.

Lagmannsretten har moglegheit til å «ankesile», det vil seie at dei kan nekte å behandle ankesaka.