Retten vil lauslate dobbeltdrapssikta kvinne

Det kjem fram i ein kjennelse frå Follo og Nordre Østfold tingrett.

Kvinna har sete i varetekt sidan ho vart pågripen, på bakgrunn av unndragingsfare.

Det vilkåret er ikkje lenger til stades. Retten meiner det heller ikkje er stor fare for at ho vil gjere noko liknande igjen, om blir ho lauslaten.

– Dette med gjentakingsfare er ei ny anføring som kom i dag tidleg frå påtalemakta. Eg meiner det ikkje er noko gjentakingsfare, og det var tingretten einig i.

Det seier kvinnas forsvarar, Jorunn Hegle Hovda.

– Det har vore ei rettspsykiatrisk undersøking, kor dei sakkunnige er einige om at det er lav fare for gjentaking.

Kvinna har innrømma at det er ho som drap mora Marit Taagerud og broren Håkon Taagerud.

Tingretten legger per nå til grunn at det vil bli reist sak om tvungent psykisk helsevern.

– Det er mest sannsynleg no at sikta ikkje hadde skyldevne, står det i kjennelsen.

Kommunen har fått bekymringsmeldingar

NRK har tidlegare opplyst at kvinna slutta i jobben sin for nokre år sidan, og sidan har stått utan inntekt i skattelistene.

Ho har hatt omsorgsoppgåver for familien sin sidan då.

Nordre Follo kommune har òg bekrefta at familien har fått tenester i heimen ved ulike tidspunkt.

Naboar NRK har snakka med beskreiv familien som stille og roleg. Dei haldt seg for seg sjølve.

Men folk var og bekymra.

Minst ei bekymringsmelding skal ha blitt sendt til kommunen.

Med unntak av ei ljospære har det ikkje vore ljos i huset på ti år, ifølgje naboar. Den gamle bilen i garden har stått der like lenge, og huset ber preg av forfall.

Fleire sa det var vanskeleg å forstå at det budde fire vaksne menneske der.