Ola blei nekta taxitur – skulle ikkje langt nok

Etter eit par dagars ferie i Polen landa Ola Moe Eik på Flesland flyplass i Bergen, saman med sambuaren og barnet deira på berre nokre månader.

Siste hinder før den nystifta familien kunne ta fatt på køyreturen heim til Kvinnherad kommune i Vestland fylke var å hente bilen deira hjå mora til Eik, berre ein fem minutts køyretur unna.

– Sidan me hadde barnevogn og ein sovande baby blei me einige om at eg skulle ta første taxi ned til mor og hente bilen. Det er jo berre eit par minutt, så det kunne jo ikkje vere noko problem, seier Eik.

Men det var eit problem – han skulle for kort.

– Sjåføren spurte om eg skulle langt. Nei, seier eg, det er eit par minutt nedi her. Nei, då ville han ikkje.

Yrkestransportlova hindrar ikkje sjåførar å velje vekk oppdrag. Likevel kan det bryta med avtalar løyvehavaren har med flyplassane sine parkeringsselskap.

– Tar dei beste turane sjølv

NRK har vore i kontakt med fleire som har opplevd liknande situasjonar ved drosjehaldeplassen på Flesland.

Då NRK sjølv prøvde å få ein taxi-tur på fem minutt frå Flesland, vart reporteren oppmoda av seks forskjellige sjåførar å bestille taxi frå ein sentral. Då ville turen bli billegare, sa dei.

Lenger bak i køen venta sjåfør Reza Hovlandsdal. Han seier han er kjent med at nokon sjåførar ikkje vil ta dei korte turane.

– Mange tar dei beste turane, og sender dei korte turane til kameratar bak. Det er jo ikkje greitt, seier han.

Han seier sjåførane ventar i kø i minst 30-40 minutt for å få ein kunde, og helst vil ha utteljing for ventetida.

– Dei fleste vil ha gode turar, sant, og dei har venta lenge. Nokon nektar, men eg er ikkje glad for det.

– Koste kva det koste vil

Eik meiner sjåføren prøvde å skremme han vekk med høge prisar då han insisterte på å bli køyrd den korte turen frå flyplassen.

– Eg hadde ein baby inne og trengde bilen for å få oss heim, koste kva det koste vil, seier Eik.

Då Eik takka ja til å betale 1000 kroner for turen, trakk sjåføren tilbodet, seier han.

NRK har vore i kontakt med fleire som er kjend med at nokon sjåførar avslår turar:

Har krav om å køyre passasjerane dit dei vil

Avinor sin kommunikasjonsrådgivar Øystein Løwer stadfestar at sjåførane utføre flyplassane har forplikta seg til å køyre passasjerane dit dei vil.

– For å få tilgang til Avinor sitt taxiområde, må ein inngå ein avtale med parkeringsoperatøren ved flyplassen. I denne avtalen ligg det krav om å køyre til passasjeren si ønska destinasjon.

Han seier dei er kjent med slike hendingar ved flyplassane deira, men vil ikkje seie det er eit stort problem.

Kom seg heim til slutt

Etter å ha prøvd lykka hjå tre-fire andre sjåførar, bestemte han seg for å bestille ein taxi. Den køyrde han dei få minutta ned til mora for 289 kroner.

Han er glad for at det ordna seg innan rimeleg tid, men er oppgitt etter opplevinga på Flesland.

– Det er uakseptabelt. Når ein taxisjåfør stiller seg opp på ein haldeplass, bør ein kunne køyre folk uavhengig av kor langt dei skal.