No kjem det nye «gorkar» – Synnøve hadde ideen bak ein av dei

For 50 år sidan byrja Coca-Cola å legge små bodskap under flaskekorkane.

Korkane blei eit samleobjekt for mange, og no skal det lanserast ein ny serie, som vil vere i butikkane rundt juletider. Denne gongen har nordmenn fått kome med forslag til kva som skal stå i korkane.

Ein av dei er Synnøve Aanstad, som bur i Tønsberg.

Sjå lista med dei nye slagorda lenger ned i saka.

– Fint livsmotto

Ho sende inn «Today is the day», som er eit av 44 nye bodskap som kjem på glasflaskekorkane i Norge, Sverige og på Island.

– Det er eit fint livsmotto, seier Aanstad.

SENDE INN: Synnøve Aanstad sende inn eit av slagorda som no blir å finne under flaskekorkane. Foto: Privat

– Gøy at tekstane i korkane kan leve evig, og vere ein del av historia. Det er stas, og fint å vere ein del av. Spesielt ettersom dette er noko eg har vakse opp med på 70- og 80-talet, legg ho til.

Coca-Cola Norge fortel om stor interesse for å sende inn forslag.

– Vi fekk inn mange gode forslag. Det er morosamt at gorkar framleis appellerer, etter femti år i Norge. Det trur vi er fordi dei spreier litt positivitet i kvardagen, det har dei gjort heilt sidan starten, seier marknadssjef Kristel Granaas.

Men du vil framleis berre finne slagorda under korkane i glasflasker. Coca-Cola har ikkje planlagt å legge slagorda i plastflaskene sine.

– Det er rett og slett tradisjon at det er glasflaskene som skal ha gorkar. No sel vi dei same flaskene også i Sverige og på Island, derfor har også desse landa blitt introdusert for gorke-kulturen frå Norge, seier Granaas.

Ekspert: Retta mot samlarar og unge

Marknadsføringsekspert Trond Blindheim seier at marknadsføringstrikset særleg kan ha effekt mot samlarar og den yngre generasjonen.

– Det vil jo sannsynlegvis auke salet ovanfor dei som er unge, seier Blindheim.

– Dess tidlegare du kjem inn i eit barns liv og etablerer ein forbrukarvane, dess meir cola kjøper dei i løpet av livet sitt. Dei assosiasjonane vi hadde til cola var at det var ei kul flaske og at det stod ting i korken, seier han om forholdet Cola då han var yngre.

Blindheim viser til at Coca-Cola og andre merkevarer har forsøkt ulike effektar opp gjennom åra.

Brusgiganten har tidlegare gitt ut jojoar, i tillegg til «gorkane», som mange har samla på. 

– Det kan vere eit forsøk på å få opp salet på glasflaskene igjen, trur han.

Coca-Cola Norge tilbakeviser at grepet er retta spesifikt mot barn og unge.

– Det stemmer ikkje. Tvert imot, konseptet med «gorkar» har følgt oss i femti år, og mange godt vaksne har gode minner med desse. Det var også denne vaksne aldersgruppa som ivrigast sende inn forslag til nye gorkar. Glasflaskene seljast mest på restaurantar og kafear, i settingar som ikkje er retta mot verken barn eller samlekultur, seier Granaas.