Vipps har no blitt lansert i Sverige etter at den svenske konkurrenten Swish takka nei til nordisk samarbeid.
Publisert 24.09.2024 06:13
– Vi har som mål å forenkle heile Norden. Difor er vi utruleg glade og spente for at vi no er tilgjengelege i Sverige, seier Rune Garborg, sjef i Vipps MobilePay.
Frå og med tysdag kan du altså vippse ein svenske like enkelt som du kan ein nordmann, ein danske og ein finne.
Det opplyser selskapet i ei pressemelding.
Nordisk løysing
I sommar slo dansk-finske MobilePay seg saman med den norske betalingstenesta Vipps. Sidan har ein enkelt kunne sende pengar over desse landegrensene på same måte som mellom nordmenn.
Svenske Swish blei invitert med i samarbeidet, men takka nei.
No blir i staden Vipps lansert i Sverige, og du kan dermed vippse pengar på tvers av Noreg, Sverige, Danmark og Finland.
Garborg seier utanlandsbetalingane mellom Noreg, Danmark og Finland har vore ein suksess, med til saman 12 millionar brukarar.
– Vi forventar ein stor auke i antal utanlandsbetalingar no som Nordens største land blir med på moroa, seier Garborg.
Kostar litt
Overføringane over landegrensene kostar fire prosent av transaksjonsbeløpet, i tillegg til at banken kan legge til eit vekslingsgebyr.
Garborg opplyser at dei vil senke prisane frå fire prosent til to prosent i samband med lanseringa, fram til 1. november.
I tillegg til enkle utanlandsbetalingar, vil svenskane også kunne nytte seg av fleire funksjonar i Vipps-appen, slik som oppgjersfunksjonen og for å betale i butikkar og til bedrifter i Noreg.
Garborg meiner denne nye tenesta er med å ruste dei for konkurransen i Norden.
– Sidan MobilePay og Vipps slo seg saman, har vi drøymt om å famne heile Norden i ein enkel app som alle kan bruke. No har vi det perfekte grunnlaget, seier Garborg.