No er dette mannen Ingebrigtsen må slå: – Han er VM-favoritt

– Denne mannen er VM-favoritt akkurat no, braut ut NRKs friidrettskommentator Jann Post da Niels Laros fossa mot målstreken under Diamond League-finalen torsdag.

«Det er offisielt: Niels Laros er favoritten til 1500-metergullet til herrane i Tokyo», skriv det anerkjente løpemagasinet Letsrun.com.

20-åringen har i lang tid vore snakka om som ei framtidig superstjerne og har slått fleire av rekordane til Jakob Ingebrigtsen dei siste åra.

Dei siste to månadene har han vunne alle dei tre Diamond League-konkurransane han har sprunge på 1500 meter/éi engelsk mil, i tillegg til å ta gull i U23-EM på 800 og 5000 meter.

Kjenneteikna ved alle sigrane: Ei heilt fantastisk avslutning.

Sigeren torsdag kom etter at han sprang dei siste 100 meterane på krutsterke 12,5 sekund, ein fart ingen av konkurrentane hadde høve til å henge med på.

– Det er ei ellevill avslutning og han distanserer jo resten, sjølv om han nesten sprang inn i ein annan ut på oppløpet. Rein maktdemonstrasjon, seier det norske stortalentet Andreas Fjeld Halvorsen, som har kjent Laros godt i fleire år og konkurrert mykje mot han.

Sjå avslutninga torsdag her:

Kor raskt må det gå?

Avslutningane til Laros har vist seg så sterke at ein samla friidrettselite no spør seg korleis det er mogleg å slå nederlendaren. I løpet torsdag kom superspurten i eit løp der han sette nederlandsk rekord med tida 3.29,20.

Da hadde franske Azeddine Habz og kenyanske Phanuel Koech, som har sprunge dei to raskaste tidene på 1500 meter i år.

– Det er vanskeleg å seie kor raskt han kan springe på 1500 meter om han går all out. Spørsmålet er korleis spurten hans er om ein klarer å dra det eitt eller to sekund ned i finalen, seier Fjeld Halvorsen.

– Det er krevjande å slå han. Om vi tenker at Jakob skal slå Niels Laros, så handlar det om stor fart frå start. Eit løp ned på 3.27. Da kan det vere han får nok, seier NRKs friidrettsekspert Vebjørn Rodal.

Ingebrigtsen, som har ein personleg rekord på 3.26,73, har sprunge under tre minutt og 28 sekund på 1500 meter fire gonger i karrieren.

Det er sjeldan at han avsluttar dei siste 100 meterane på under 13 sekund, men han hadde eksempelvis 12,86 på dei siste 100 meterane da han tok EM-gull i fjor på tida 3.31,95.

Sjå den avslutninga her:

Rosar Ingebrigtsen: – Han er ekstraordinær

I meisterskap er OL-finalen i fjor Ingebrigtsens raskaste løp, der han drog gjennom store delar av finalen, men til slutt stivna og blei nummer fire på tida 3.28,24. Han blei også slått i VM-finalane i 2022 og 2023, der vinnartida blei på 3.29-talet.

– Eg håpar berre han er frisk, at han vil vere der og er klar til å konkurrere. Så får vi sjå kven som er best, sa Laros til NRK om Ingebrigtsen torsdag kveld, før det blei klart at Ingebrigtsen kjem til VM.

– Trur du at du har ein fordel med tanke på det du har vist?

– Det er vanskeleg. Han har ikkje sprunge i det heile. Slik eg har erfart det, så er det litt krevjande, men eg veit at han er ekstraordinær og kan vere i veldig god form utan nokre løp. Eg er klar for å møte han og så får vi sjå.

Sjølve favorittstempelet han fekk frå NRKs kommentator, tar han med eit smil.

– Det er ei ære. Eg tar det. Men løpet blir ikkje sprunge på papiret, så eg må framleis dra dit, vise kva eg kan og slå mange gode for å oppfylle det, seier nederlendaren.

– Har tatt eit stort steg

Sommaren har uansett vist at Laros er klar for å ta det neste steget, etter sjetteplassen i OL-finalen i fjor. I aldersbestemte klassar har han lenge herja, med to gull i U18-EM i 2022, to gull i U20-EM i 2023 og no to gull i U23-EM i sommar.

No reiser han til Tokyo etter å ha vunne dei siste seks løpa sine, fordelt på tre Diamond League-sigrar, to U23-EM-gull og éin siger i lag-EM.

– Han har tatt eit stort steg i år. Han har vore god før, han har vore ei barnestjerne, men det han viser oss nå er eit fantastisk nivå, seier Rodal.

– Han har komplette ferdigheiter med kapasiteten, farten, spurten og dei avsluttareigenskapane, legg han til.

Også Rodal held Laros høgt oppe inn mot VM, som startar 13. september.

– Eg er full av beundring for Niels Laros. Han slår veldig sterke utøvarar med eitt sekund. Han leikar med konkurrentane sine. Og det er løparar som har sprunge fort i år og i fjor. Han er i ferd med å ta eit favorittstempel på 1500 meter i VM.

Laros sjølv vedgår at det faktisk var ein tung start på sesongen, prega av sjukdom. Men nå er han frisk.

– Eg kjente meg veldig bra og eg drar til Tokyo vitande om at eg er på ein god stad, seier han.

Der kan vi første gong sidan Diamond League-finalen i fjor også få sjå Laros, regjerande verdsmeister Josh Kerr, regjerande olympisk meister Cole Hocker og Jakob Ingebrigtsen i same sprang igjen.

PS! Laros er kvalifisert til å springe 800 og 5000 meter òg, i tillegg til 1500 meter i VM. Han bekrefta til Citius Mag torsdag at 1500 meter blir hovudfokuset hans i VM.