Mista kollega i angrep mot Raude Halvmåne

Nylege bilete av bygget og satelittbilete frå 2023 viser at bygget var tydeleg merka med logoen til Raude Halvmåne sett både frå bakkenivå og lufta.

– Angrepet var brutalt og overraskande, seier Raed Al-Nams, talsperson for organisasjonen i Gaza, til NRK.

Det første angrepet trefte overetasjen, deretter første etasje.

– Medan staben vår evakuerte folk og inspiserte skadane, blei bygget angripe igjen, først andre etasje og deretter første etasje, seier Nebal Farsakh, som også jobbar i organisasjonen.

Ho fortel at dei ikkje fekk noka åtvaring frå Den israelske hæren (IDF) og heller ikkje noka forklaring i etterkant.

– Bygget har fått store skader, men vi skal halde fram med arbeidet vårt så godt vi kan, seier Al-Nams.

NRK har bedt IDF svare på spørsmål om angrepet. Dei seier at dei undersøker saka.

– Ikkje berre ein kollega

Den 51 år gamle sikkerheitsvakta Omar Mansour Islim blei drepen i angrepa. Han etterlet seg sju barn.

– Omar var ikkje berre ein kollega, men ein bror for oss alle. Han var dedikert i oppdraget sitt, sjølv i dei vanskelegaste stundene, seier Al-Nams.

I tillegg blei to andre tilsette skadde, samt ein som kom til for å hjelpe.

29 drepne på jobb

Dette er ikkje det første angrepet på Raude Månes hovudkvarter i Khan Younis.

Bygget ligg like ved Amal-sjukehuset, som også har vore under angrep tidlegare.

51 av Farsakh sine kollegaar i Raude Halvmåne har blitt drepne sidan krigen starta, 29 av dei medan dei jobba, fortel ho.

I mars blei åtte ambulansearbeidarar drepne av IDF då dei prøvde å nå fram til offer for eit israelsk angrep i Rafah. Totalt 15 helsearbeidarar blei funne i ei massegrav etter angrepet.

IDF har sagt at hendinga var ein operasjonell feil.

Helsearbeidarane køyrde i tydeleg merka ambulansar med blålys.

På grunn av dei høge dødstala over kort tid dei siste 22 månadane, har FN omtalt Gaza som verdas farlegaste plass for hjelpearbeidarar.

– Dette er eit klart brot på folkeretten, som skal beskytte våre arbeidarar. Vi held det internasjonale samfunnet ansvarleg for at dette får halde fram, seier Farsakh.