Listhaug til angrep på AUF-leiaren: – Du er ein notorisk løgnar

– Du er ein notorisk løgnar, seier Sylvi Listhaug (Frp).

Skuldingane var retta mot AUF-leiar Gaute Skjervø, etter at han skildra Frp som eit parti som er imot fagforeiningane.

Sjå klippet øvst i saka.

Kort tid etter tok Skjervø ordet sjølv og påpeika ordbruken.

– No har eg nettopp vorte skulda av statsministerkandidaten frå Frp for å vera ein notorisk løgnar, seier han.

Etter debatten seier Skjervø til NRK at han er overraska over ordbruken til Listhaug.

– Dette viser at årets valkamp er spesielt hard i kantane.

AUF-leiaren understrekar at han synest det er bra at ein tør å vera ueinig med andre.

– Eg kan sjølv vera tøff i klypa, men eg lurar på om dette er riktig måte å omtala sine politiske motstandarar på, seier han.

Tar AUF-leiaren i forsvar

Òg Unge Høgre-leiar Ola Svenneby meiner ordbruken i debatten var uheldig, og peikar spesielt på Listhaug og Støre.

– Eg skjønar at dei har interesse av å låsa diskusjonen mellom dei, men no drar dei debatten ned på eit nivå eg ikkje trur tener veljarane spesielt godt.

Han tar òg AUF-leiaren i forsvar.

– Eg synest at skildringa av Skjervø som notorisk løgnar, ikkje er rettferdig. Det er veldig mykje eg er politisk einig i med Gaute. Han er ein raus kar, han er hyggeleg. Ein notorisk løgnar, det er han ikkje.

Skuldingane hagla

Debatten starta med eit brak, ved at Listhaug og Erna Solberg (H) skulda Arbeidarpartiet og Støre for løgn i valkampen.

– Det har vorte ført ein skremselspropaganda og løgner frå Arbeidarpartiet og deira hovudsponsor, LO, i denne valkampen, seier Listhaug.

Ordet «løgn» blei fort eitt av dei mest brukte orda.

– Då har de noko å skjula, når de brukar så sterke ord, seier statsminister Jonas Gahr Støre (Ap).

Støre reagerer på at både Listhaug og Solberg kallar Ap-utsegner for «løgn», medan han sjølv peikar på «feil» hos dei borgarlege partia.

– Viss du har ambisjonar om å verta statsminister i Noreg, og så seier du om meiningsmotstandarane dine at dei lyg og driv med desinformasjon... Då vert det eit anna Noreg, seier Støre til Listhaug.

Vestre-video

Bakgrunnen for fleire av skuldingane er ein video helseminister Jan Christian Vestre (Ap) delte på Facebook-sida si for nokre dagar sidan.

TV 2 er blant dei som har omtalt saka.

Der seier han mellom anna at Høgres barnehagepolitikk vil gjera det 19.000 kroner dyrare for dei med eitt born i barnehage, og at tannlegebesøk vert dyrare for dei under 28 år.

– Dei har laga ein film som er full av løgn. Eg synest jo det vitnar om ei regjering, eit Arbeidarparti som manglar visjonar for framtida. Difor må ein ty til sverting av sine politiske konkurrentar. Ikkje berre sverting, men det er løgn, seier Listhaug.

Sjå Listhaug sin kommentar:

Solberg seier det i dagens samfunn med sosiale medium og kunstig intelligens er viktigare enn nokon gong å vera edrueleg.

– Me skjønar at ting kan bli tatt heilt ut av samanhengen sin. Me har sagt at kostnadene for ein familie har auka med 190.000, men me har også sagt at dei har fått meir inntekter. Men summane er framleis ei stor utfordring, seier Høgre-leiaren.

Vestre har allereie avvist skuldingane i eit langt innlegg på Facebook.

Frp får kritikk for reknestykke

Men òg Framstegspartiet har vorte kritiserte for feil i valkampen

I august sa Sylvi Listhaug mellom anna at ein «heilt vanleg familie» hadde fått nesten 200.000 kroner i auka utgifter med Støre-regjeringa.

AUF-leiar Gaute Skjervø meiner Frp-reknestykket teiknar seg inn i ei forteljing høgresida har brukt heile valkampen.

– At Ap er skuld i prisstiginga. Som om Jonas Gahr Støre set prisen på kjøttdeig på Kiwi. Det er det eigaren i Norges gruppen som gjer. Den same mannen som bruker meir pengar på å finansiere deira valkamp enn heile AUF sitt samla valkampbudsjett, seier han.

– Passar aldri for KrF å gjera noko for palestinarane

Deretter møttest representantar frå dei andre partia på Stortinget.

Venstre og MDG diskuterte klima, Rødt og KrF snakka om krigen i Gaza og Senterpartiet og SV debatterte kriminalitet.

Hadle Rasmus Bjuland (KrF) var klar på at dei er kritiske til Benjamin Netanyahu si krigføring i Gaza, men at dei ikkje vil anerkjenna Palestina som eigen stat no.

– Det er det som er så skakkøyrt i den norske Midtausten-debatten. Alle dei andre partia vil anerkjenna utan å stilla krav til Hamas, seier Bjuland.

Mímir Kristjánsson (R) meiner derimot at det «aldri passar for KrF å gjera noko for palestinarane».

– Spørsmålet er jo om Noreg skal stå stille og sjå på det FNs spesialrapportør meiner er eit folkemord på Gazastripa? Bør ein ikkje då kunna fordøma Israel og krigføringa deira?

– Ikkje heilt elegant

Til slutt hadde Ap, Frp og Høgre fått invitera kvar sin hemmelege gjest.

Tidlegare statsminister Gro Harlem Brundtland (Ap), stortingsrepresentant Sandra Bruflot (H) og Sebastian Saltrø Ytrevik (FpU) dukka opp til ein sofaprat med Fredrik Solvang.

Ytrevik fortalde då om ei episode under valkampen kor han og andre medlem av FpU vart trua i samband med ein skuledebatt.

– Det skal ikkje vera sånn at 16-17-åringar skal måtte ha politibeskyttelse når dei går på skulen. Når eg er ferdig i ein debatt, skal ikkje eg trenga eskortering av to sivile politimenn, seier han.

Historia sjokkerte Gro Harlem Brundtland.

– Eg er overraska over det eg høyrde no, at det skjedde, seier ho.

Ho meiner òg at debattane er heilt annleis no enn då ho var aktiv politikar.

– Eg synest det vart mykje skjelling fram og tilbake. Mykje kraftige ord og uttrykk. Det var ikkje heilt elegant, oppsummerer ho.

Meinte det var eit vanskeleg utgangspunkt

– Det var jo litt høg temperatur, seier Erna Solberg til NRK etter debatten.

Ho meiner det var eit vanskeleg utgangspunkt å diskutera kva partia har sagt om kvarandre, i staden for kva dei vil gjera framover.

– Var ordskiftet hardare enn du har opplevd tidlegare i norsk politikk?

– Ja, det var det. Men det var òg utgangspunktet, for me skulle snakka om kva dei andre hadde sagt som me meinte var usant, svarar Solberg.