Israel stoppar naudhjelps­pausar i Gaza by

Det israelske militæret (IDF) avsluttar den såkalla taktiske pausen dei har hatt dagleg i Gaza by, og erklærer byen for krigssone.

Det skriv dei på Telegram.

Pausen har gjort at noko naudhjelp har kome inn i den svoltherja byen, og blei innført under stort internasjonalt press tidlegare i august.

IDF skriv også at dei «opererer med full styrke» i utkanten av Gaza by.

Hæren har kravd at alle sivile forlèt Gaza by før ein varsla bakkeinvasjon med mål om å okkupere byen. Den siste veka har dei angripe frå lufta, og er allereie inne med stridsvogner i nabolaga i utkanten av byen.

«Knusande konsekvensar»

Avgjerda vil ha knusande konsekvensar for sivile som bur der det allereie er forhold for hungersnød, skriv FN i ei fråsegn der mellom anna Unicef og Verdas matvareprogram har signert.

«Mange menneske, særleg sjuke og underernærte barn, eldre og folk med nedsett funksjonsevne, er ute av stand til å evakuere», skriv dei.

Ein talsperson for IDF sa tidlegare denne veka at ei såkalla evakuering av Gaza by er «uunngåeleg». FN har tidlegare sagt at evakueringsordrane i praksis er fordrivingsordrar.

Våpenkvile på bordet

Samstundes ligg eit forslag om våpenkvile på bordet. Hamas har godtatt forslaget, men Israel har ikkje ennå svart. Statsminister Benjamin Netanyahu har sagt at Israel vil angripe Gaza by samstundes som dei jobbar for våpenkvile.

Han seier også at angrepet er den sikraste måten å svekke Hamas og få tilbake gislane på, men dei siste dagane har tusenvis protestert mot taktikken. Som svar har Israel innført forbod mot store demonstrasjonar.

Netanyahu blir skulda for å forlenge våpenkvileforhandlingane for å sikre eigen politiske overleving. Han er tiltalt for korrupsjon og etterlyst av Den internasjonale domstolen (ICC) for det dei meiner er krigsbrotsverk i Gaza. Sjølv avviser han alle skuldingar.