Gode nordlys-sjansar i kveld – men kvifor ser kameraet det betre enn deg?

– Det er fordi eit kamera er meir følsamt for lys enn auga. Særleg viss du brukar lang lukkartid, så klarer det å fange mykje meir lys enn auga klarer å fange.

Det seier fysikar, vitskapsformidlar og nordlysekspert Veronica Danielsen.

Då rosa og grønt nordlys farga himmelen i går kveld, var det mange som opplevde at dei såg dette betre med mobilen.

– Viss ein har svakt mørkesyn ser ein dårlegare nordlyset. Men, det tar også veldig lang tid å få fram sitt beste nattesyn, så viss du vil sjå nordlys bør du eigentleg sitte ute i mørket, utan å sjå på mobilen, seier Danielsen.

Meir nordlys i vente

Viss ein skulle sett nordlys betre med augo, burde ein ifølge Danielsen, kome seg ut av sentrum, til ein stad det ikkje er så mykje lysforureining.

– Og sjå mot nord. Iallfall om ein er i Bergen. Er ein på Svalbard må ein nokre gonger sjå mot sør, seier Danielsen.

Timingen er også viktig.

Nokre har appar som varslar når det kan kome nordlys, men Danielsen fortel det er størst sjanse for nordlys rundt haustjamdøgn og vårjamdøgn.

Altså i månadsskiftet september/oktober og mars/april.

– Ikkje midt på vinteren, som ein kanskje trur. Akkurat no er ei ganske bra tid.

– Bur ein i Nord-Noreg er det sjanse heile året på haust, vinter og vår, men under haustjamdøgn og vårjamdøgn skal det mindre solstormar til for at det blir effekt.

– Fredag kveld kan det bli ein del nordlys, men ikkje så kraftig som i går, seier fagsjef ved Norsk Romforskning, Pål Brekke.

I går var det ein KP-indeks på 8 av totalt 9. Med ein KP-indeks på 4 i kveld, ser det mørkt ut sør for Midt-Noreg, seier Brekke.

Men det kjem mykje godt i vente for nordlys-entusiastar framover, seier han.

– Me får no to-tre år framover med masse nordlys, sånn som vi har sett nå de siste ukene her sør også.

Fekk mykje reaksjonar

Fotograf Anna Takle fanga også nordlyset i Bergen i går.

– Først syntest eg at det begynte nokså svakt. Det var berre nokre strekar på himmelen. Då eg tok opp mobilen såg eg at det blei grønt og litt rosa, seier Takle.

Sjølv brukte ho ein iphone med nattmodus og lang lukkartid for å fange nordlyset.

– Mobilen med innebygd nattmodus fangar opp mykje meir lys enn kva du ser. Mobilen tar også lang lukkartid, og då klarer den også å fange meir enn auget ser.

– Aller helst bør ein bruke eit kamera der ein kan stille inn på blendar, iso, og lang lukkartid sjølv. Men, i dag kan ein få veldig bra bilete ved å bruke mobilen. Stabilisatoren gjer at ein kan ta bilete når ein held mobilen, utan å bruke stativ.

– Er det juks å redigere nordlysbilete etterpå?

– Ja, viss du legg på noko, vil eg seie det er juks. Eg tar mine bilete i RAW og hentar tilbake fargane, og då meiner eg det ikkje er juks. Så lenge du ikkje legg på noko som ikkje er der frå før, så tenker eg det er innafor.

Bilete fanga av kamera og redigert bilete. Er det juks å redigere?

Kari Nygard Tvilde

– Rosa er sjeldan

Nordlysekspert Veronica Danielsen var også ute og såg på det rosa nordlyset i bergensområdet i går kveld.

Skal ein få med seg dette, må ein vere på rett stad til rett tid.

– Rosa nordlys er ganske sjeldan, seier Danielsen.

Ho fortel at dei forskjellige fargane på nordlyset kjem frå ulike gassar i atmosfæren, i kvar sine høgder.

– Det rosa nordlyset kjem frå nitrogengass, som er cirka på 80 til 100 kilometer over bakken. Det er ikkje så ofte at solvindpartiklane, dei som set i gang nordlyset, kjem seg så langt ned i atmosfæren.

– Dei som har fått med seg dette, er veldig heldige.