Glatte vegar i Aust og Vest – to alvorleg skadde

Vegtrafikksentralen har på morgonkvisten fått fleire meldingar om glatte vegar i Vestland, Møre og Romsdal og i Østfold.

I Halden er to personar sende til sjukehus etter ei trafikkulukke mellom to bilar på fylkesveg 220. I Haram er ein person sendt til sjukehus med moderate skader.

– Begge førande av dei to bilane er alvorleg skadde. Ein tredje person som har vore i ein av bilane, er ikkje skadd, seier innsatsleiar for politiet, Martin Grimstad, til Halden Arbeiderblad.

Fire uhell på to timar

Ulukka er ei av fleire følgjer av glatt veg fredag morgon. Berre i Vestland har ti personar vore involverte i fire trafikkuhell på to timar.

• Ei kvinne er sendt til legesjekk etter eit «dobbeltuhell» i Bjørnafjorden. ein mann er mistenkt for promillekøyring.
• I Søre Fusa køyrde ein av vegen i ein sving og velta over på sida.
• På Bømlo har tre bilar køyrd av Økslandsvegen på same stad. Ein av bilane ligg på taket.
• Tre personar, av desse to born, kom uskadde frå eit trafikkuhell i Fjaler.
• På Vatnedalsvegen i Haram kommune var det berre 200 meter mellom ei singel- og ei møteulukke.

– Her ligg det ei oppmoding om å køyre etter forholda, og å ta det litt med ro, seier operasjonsleiar Ole Ronny Olsen ved Vest politidistrikt.

Fleire meldingar

Trafikkoperatør Tina Fjeldavli ved Vegtrafikksentralen seier dei har fått spreidde meldingar om glatt veg i Vestland. Entreprenørar er varsla, men ho ber folk køyre varsamt.

Denne oppmodinga deler Olsen hos politiet.

– Når det blir dropp i temperatur, så kan det bli glatt når det regnar på kald veg, seier Olsen.

Etter ein periode høvesvis høge temperaturar, har no kvikksølvet stabilisert seg lågare på gradestokken.

På nattetid ligg temperaturen fleire stader kring null. Når det kjem regn på kald bakke, så kan det gi trafikale utfordringar.

– Det kan vere stadar der underkjølt regn har frose, så køyr forsiktig og køyr etter forholda, seier Olsen.