Folk vil bort frå masseturismen: – Vil ha ei ekte oppleving

Det er stille på Flø på Sunnmøre. Berre bølgjene slår mot moloen, og ein tysk familie står med fiskestenger og prøver lukka i havgapet. For mange ferierande er det nettopp dette dei leitar etter.

– Det er så fint, vakkert og roleg. Akkurat det vi treng, seier Andreas Taedcke.

Han er ein av stadig fleire turistar som oppsøker små stader. No peikar mykje på ein tydeleg trend: Folk vil bort frå dei store turiststraumane – og nærmare naturen, stillheita og det ekte.

Beatrix Rehberg, Andreas Taedcke og dottera Adriana liker seg på Flø feriesenter.

Auke etter covid

Fenomenet blir ofte kalla mikroturisme – små, lokale opplevingar utanfor allfarveg. Ifølgje Innovasjon Noreg har interessa auka kraftig dei siste åra, spesielt sidan covid-åra.

– Under pandemien oppdaga mange nordmenn kor mykje spennande som finst i eige land, og med betre tilbod, høgare kvalitet og fleire unike opplevingar enn før, ser vi no auka interesse for små «mikroeventyr» utanfor allfarveg, seier Aase Marthe J. Horrigmo, som er direktør for reiseliv i Innovasjon Noreg.

Også destinasjonsselskapet i Møre og Romsdal ser det same.

– Folk vel dette som eit alternativ til dei store turiststadene, eller som eit tillegg til det, seier Tom Anker Skrede som er direktør for Vist Northwest i Møre og Romsdal.

Han seier det dei siste fem til sju åra har vore ein tydeleg trend at mindre turistverksemder blir stadig meir populære, også blant utanlandske turistar.

Søker seg vekk frå varmen

På Flø handlar opplevinga om det enkle og det rå. Hit kjem turistane for å fiske, surfe – eller berre kjenne på vêret.

– Når det blir brennheitt i Sør-Europa og USA, kjem dei hit til oss, seier Inge Eidem, ein av dei nye eigarane av Flø feriesenter.

Kort veg frå sjø til fjell og ope hav gjer staden attraktiv. Og ikkje minst få andre turistar.

– Det er aldri kø her ute. Vi ligg i enden av ein veg ut mot havet, seier Eldar Stein Flø, som har drive feriesenteret i over 30 år før det nyleg blei selt.

Han trur etterspurnaden berre vil auke framover.

Mikrohus og lokal mat

I Møre og Romsdal er det mange som driv i liten skala og som tilbyr noko spesielt. Blant desse er Kråen Gard i Sande kommune.

Her tilbyr eit ektepar mikrohus, lokal mat og enkle opplevingar tett på naturen.

– Eg trur mange som kjem hit søker seg mot det ekte norske. Ei ekte oppleving, for å bruke det uttrykket. Det vi tilbyr skal vere litt «nedpå», seier Terje Grønmyr.

Veronika Johansen Grønmyr og Terje Grønmyr kjøpte Kråen gard i 2017 og har bygd fem mikrohus. Heimelaga svele er på menyen.

Dei har fått gjester frå både Europa og USA – og etterspurnaden aukar.

Kan doble seg globalt

Ifølge Tom Anker Skrede i Visit Northwest er kommunane viktige for å utvikle småskalaturisme.

– Vi legg til rette for dei som driv med turisme i mindre skala, samtidig som vi dermed får vist fram kommunen vår, seier ordførar Stian Skorgen Scheide i Ulstein kommune. Han kallar det ein vinn-vinn-situasjon.

Ein internasjonal rapport frå analysebyrået Future Market Insights viser at det er gode utsikter for småskalaturisme dei neste ti åra.

Den viser at på verdsbasis kan denne typen turisme doble seg fram mot år 2035.

– Vi kjem tilbake i sommar

På Flø har Andreas Taedcke, kona Beatrix og dottera Adriana akkurat fått fisk. Dei er her for første gong, men trur ikkje det vil bli den siste.

– Flø har vore ei nydeleg oppleving for oss. Vi kjem heilt sikkert tilbake til sommaren, seier han