FN-sjef til Netanyahu: Hungersnøda i Gaza er reell og skjer nå

– Vi får inn litt meir mat. Vi bevegar oss i rett retning, men det er framleis langt frå nok til å gjere det vi må for å sikre at folk ikkje er underernærte og ikkje svelt, seier administrerande direktør i WFP Cindy McCain til nyheitsbyrået AP.

Ho opplyser at WFP nå får inn rundt 100 hjelpelastebilar dagleg til Gaza – langt færre enn dei 600 lastebilane som kom inn dagleg under våpenkvila som varte fram til midten av mars.

Den israelske militære eininga COGAT, som koordinerer hjelpetilførselen til Gaza, uttaler i ei felles pressemelding med det israelske forsvaret at over 300 humanitære lastebilar passerer grensa dagleg. Dei fleste av dei fraktar mat.

– Desperasjonen blir stadig større, og eg såg det med eigne auge, fortel amerikanske McCain etter møte med alvorleg underernærte palestinske barn på Gazastripa.

Ho skal ha snakka med statsminister Benjamin Netanyahu om det presserande behovet for meir hjelp.

Netanyahu, som fleire gonger har nekta for at det finst svolt i Gaza, var ifølge McCain «openbert veldig bekymra for at folk ikkje får nok mat».

Netanyahu har kalla rapporten frå den FN-støtta ekspertgruppa IPC, som for ei veke sidan erklærte hungersnød i Gaza by, for «rein løgn».

I ei fråsegn etter møtet med McCain seier Israel at dei er einige om å auke innsatsen for å framskunde og halde oppe innførselen av humanitære varer til Gaza, skriv Reuters.

– Barna er «ukjennelege»

McCain besøkte denne veka Deir al-Balah og Khan Younis, og legg ikkje skjul på at ho blei skaka over synet som møtte henne.

– Synet som møtte oss var total øydelegging. Områda er i praksis jamna med jorda, og vi såg menneske som er ekstremt underernærte, fortel ho.

– Gaza er ved eit brestepunkt, seier McCain.

WFP-sjefen besøkte blant anna sjukehus og møtte underernærte barn og gravide kvinner.

– Barna er «ukjennelege» samanlikna med bilde som blei tatte av dei da dei framleis fekk nok mat, seier ho.

– Det skjer nå

Ifølge FN-ekspertar opplever rundt 500 000 menneske i Gaza hungersnød.

Ein rapport publisert av den globale overvakingsgruppa for svolt, Integrated Food Security Phase Classification, anslår at nesten ein firedel av befolkninga i Gaza nå lever under hungersnødliknande forhold i Gaza by og områda rundt.

– Det er ekte, og det skjer nå, seier McCain, som etter Gaza-besøket også har møtt Palestinas statsminister Mohammad Mustafa i Ramallah på den okkuperte Vestbreidda.

Cindy McCain, leiar for FNs matvareprogram (WFP), uttrykte håp om betre tilgang til Gaza etter eit møte onsdag med Israels forsvarssjef, generalløytnant Eyal Zamir.

Israel seier at dei framleis vil operere mot terrororganisasjonar over heile Gazastripa. Torsdag blei minst 16 palestinarar drepne og fleire såra, ifølge lokale helsearbeidarar, melder nyheitsbyrået Reuters.

FN ber om omgåande våpenkvile

FNs generalsekretær António Guterres gjentok fredag kravet om omgåande våpenkvile i Gaza.

Han åtvara vidare om at den humanitære krisa har nådd eit nivå som han beskriv som «horribelt».

– Familiar har blitt fordrivne gong på gong – og er nå pressa saman på mindre enn ein femdel av Gazas areal. Bomber fell ned på telt, på familiar, og menneske som ikkje har nokon stad å flykte, seier han.

Guterres bad om tre tiltak:

• Våpenkvile
• Lauslating av gissel
• Full humanitær tilgang

Han understrekar at jakta på mat aldri bør bli ein dødsdom. Han minte også om at Israel har eit juridisk ansvar for å legge til rette for nødhjelp, og bad statsleiarane i verda om å bruke innverknaden sin for å sikre dette.