FN om drap på journalistar i Gaza: – Bør sjokkere heile verda

– Vi har sett og dokumentert mange uakseptable angrep på journalistar.

Det seier talsperson for FNs menneskerettskontor, Thameen Al-Kheetan. FN har til saman dokumentert 247 drap på pressefolk sidan krigen starta.

– Drapa bør sjokkere heile verda, legg Al-Khetan til.

Totalt blei minst 20 personar drepne i to israelske angrep på Nasser-sjukehuset sør på Gazastripa, melder helsestyresmaktene i Gaza.

Dei drepne journalistane har no blitt namngitte av Reuters. Hussam al-Masri, skriv dei, var på oppdrag for nyheitsbyrået då angrepet skjedde.

I tillegg blei frilansarane Mariam Abu Dagga (AP), Moaz Abu Taha, Ahmed Abu Aziz, og Al Jazeera-journalisten Mohammed Salama, drepne.

«Tragisk uhell»

IDF seier at den tidlege fasen av etterforskinga har avdekka at målet var eit Hamas-kamera i området ved sjukehuset, ifølge Reuters.

Dette har tidlegare blitt meldt av den israelske avisa Haaretz.

– Stabssjefen i militæret har bede om at ei etterforsking blir utført umiddelbart for å forstå omstenda kring det som skjedde, og korleis det skjedde, skreiv ein talsperson for det israelske militæret (IDF) på Telegram måndag. .

– Vi er leie for all skade på individ som ikkje er involverte.

Den israelske statsministeren Benjamin Netanyahu har tidlegare kalla drapa på journalistane eit «tragisk uhell», melder CNN. Israel nektar for at dei angrip sivile med vilje.

Sterke reaksjonar frå verdssamfunnet

Fleire land har fordømt angrepa på Nasser-sjukehuset måndag, blant dei Canada og Kina. Sistnemnde seier dei er «sjokkerte».

EU-kommisjonen seier tysdag at den reknar angrepet som «fullstendig uakseptabelt», og krev at journalistar blir verna under Folkeretten.

– Sivile i Gaza har lide altfor lenge og altfor mykje. Det er på tide å bryte valdssirkelen, seier talsperson Anouar El Anouni vidare.

Samtidig seier den tyske forbundskanslaren Friedrich Merz at han ikkje trur måndagens angrep var målretta mot journalistane.

– Eg vil venta på resultatet av denne granskinga før eg gjer meg ein endeleg konklusjon, legger han til.

Har ingen tru på israelsk gransking

Midtausten-ekspert Hilde Henriksen Waage meiner det ikkje vil kome noko ut av Israel si gransking av angrepa.

– Det hender at den israelske hæren og forsvarsleiinga nokre gongar konkluderer med at dette var feil, dette var ikkje målet vi meinte å nå, seier ho til NRK.

– Men bortsett frå nokre tomme unnskyldningar etterpå, så skjer det ingenting. Dei militære aktørane som har gjennomført angrep av denne typen, får heller ingen konsekvensar.

Waage meiner at drap på journalistar er ein del av Israel sin strategi i krigen.

– Det er det ingen tvil om. Berre talet på journalistar som er drepne fortel oss det. Det er sjølvsagt ein del av det større målet, den større propagandakrigen, seier ho.

– Dette handlar ikkje lenger om Hamas. Dette handlar om Israel sitt større mål om å re-okkupere og få tilbake Gazastripa ein gong for alle.

NRK har sendt desse kommentarane til IDF sitt pressekontor.

Dei svarar ved å vise til den opphavlege utsegna om angrepa på Nasser-sjukehuset, men kommenterer ikkje saka ytterlegare.

Demonstrasjonar held fram i Israel

I morgontimane tysdag blokkerte tusenvis av demonstrantar trafikken fleire stader i Israel, blant dei hovudvegen som koplar Tel Aviv og Jerusalem, skriv avisa The Times of Israel.

Dei krev at regjeringa inngår ein avtale for å sleppe fri dei 50 israelske gislane som framleis er inne i Gaza, og at krigen tek slutt.

Samtidig samla familiemedlemmer av gislane seg på Gisselplassen i Tel Aviv for å snakke med pressa.

Iztik Horn, far til gisselen Eitan Horn og frigjorde Iair Horn, krev til avisa at Israel signerer våpenkvileavtalen som Hamas har godkjent.

Det israelske tryggingskabinettet skal møtast tysdag. Lokale medium skriv at dei skal diskutere vidare våpenkvileforhandlingar.

– Framgang i planen om å okkupere Gaza medan det ligg ein avtale på bordet som ventar på statsministerens signatur, er eit stikk i hjartet vårt, seier Horn.