Fekk stein gjennom taket etter sprengingsuhell: – Vi er glad ingen blei skadd

– Vi er glad for at det ikkje skjedde noko alvorleg, og at ikkje liv gjekk tapt.

12 år gamle Maja Czajkowski var heime saman med dei to søskna sine då det smalt ved 16-tida måndag ettermiddag.

Eit sprengingsoppdrag ved Høgset industriområde i Gjemnes kommune gjekk gale og fleire steinar blei kasta kring om i nærområdet.

Den eine steinen trefte huset til David Czaikowski og familien hans ikkje så langt frå indutsriområdet, gjekk gjennom taket og hamna på golvet inne på eitt av romma.

– Steinen er på 23 kilo og er 40–50 centimeter stor, seier David til NRK.

Gjekk gjennom taket

Han var på jobb nede på Høgset-terminalen da ulukka skjedde under sprengingsoppdraget

– Eg såg opp mot huset vårt, og der sto dei tre borna og vinka i vindauget.

David for opp til huset og oppdaga at ein stein hadde treft huset deira og gått gjennom taket. NRK har sett fleire bilete frå inn i huset. Bileta viser at det er gjort skade fleire stader.

Vil etterforske saka

Også i området kring huset ligg det fleire større steinar. Politiet rykka ut då dei fekk beskjed om sprengingsulukka. Dei har gjort avhøyr og har tatt bilete.

– Vi har oppretta sak og vi kjem til å starte etterforsking av det som har skjedd, seier operasjonsleiar i Møre og Romsdal politidistrikt, Eivind Klokkersund.

Hendinga har sett ein støkk i familien Czajkowski. Dei vil og gjerne vite kva som gjekk gale under sprengingsoppdraget.

– Det var veldig skremmande, seier Maja Czajkowski.