Familiane til to dei to barna som blei drepne under skytinga på ei skulemesse i Minneapolis på onsdag, talte på ei minnestund som blei halden natt til fredag norsk tid.
Barna var åtte år gamle Fletcher Merkel og ti år gamle Harper Moyski.
Onsdag morgon hadde skuleelevar samla seg til messe i den katolske skulekyrkja ved Annunciation Catholic School, som ligg i delstaten Minnesota.
– Ein feiging bestemte seg for å ta vår åtte år gamle son Fletcher frå oss, sa faren, Jesse Merkel, ifølge CBS News Minnesota.
– På grunn av dette, får vi aldri halde rundt han, snakke med han, leike med han, eller sjå han bli den flotte unge mannen han skulle bli.
Åtte år gamle Fletcher Merkel.
Foto: NTBHan sa at Fletcher elska familien sin og vennane sine, fisking, matlaging og alle former for idrett.
– Ver så snille å hugse Fletcher for den personen han var, ikkje for handlinga som tok livet av han. Gi barna dykkar ein ekstra klem i dag. Vi elskar deg, Fletcher, avslutta han.
Jesse Merkel, far til Fletcher Merkel.
Foto: Aaron Lavinsky / AP / NTBFamilien til Harper Moyski bad om at hendinga fører til handling for å stanse våpenvald i USA.
– Harper var kvikk, blid og djupt elska. Vi som foreldrar er knuste, det same er søstera til Harper, som elska storesøstera si og som no sørgar over eit utenkeleg tap, sa foreldra, Michael Moyski and Jackie Flavin.
Ti år gamle Harper Moyski blei eitt av offera.
Foto: NTB120 skot
Skyttaren er identifisert som 23 år gamle Robin Westman.
Hendinga blir etterforska som terror, sjølv om etterforskarar seier det ikkje var ei einskild gruppe skyttaren var ute etter.
– Angriparen lèt til å hate oss alle, sa politisjef i Minneapolis, Brian O'Hara, på ein pressekonferanse torsdag, skriv BBC.
– Meir enn noko anna, ville skyttaren drepe barn.
Westman fyrte av totalt 116 riflekuler, éi pistolkule og tre hagleskot mot barna, sa O'Hara.
Westman hadde skrive «Hail Breivik» og «drep Trump» på våpenet ho brukte, men har skrive i eit manifest at ho ikkje hadde noko motiv for angrepet, særleg ikkje noko høgreekstremt.
Justisministeren i Minnesota, Joseph Thompson, sa at Westman uttrykte hat mot mange grupper, blant dei det jødiske samfunnet og mot president Donald Trump.
Sjølv skreiv Westman ei slags dagbok som ho las høgt frå i eit slags manifest som ho publiserte på YouTube. Etterforskarar går no gjennom alt av videoar og notat, skriv BBC.
Teikning av kyrkjerommet, frå Robin Westman si dagbok.
Foto: Robin Westman via YouTube / Reuters / NTBWestman skreiv med kyrillisk alfabet for å halde planen hemmeleg.
Foto: Robin Westman via YouTube / Reuters / NTB
Så seint som sist veke skreiv Westman om at ho drog til kyrkja for å planlegge angrepet, teikna opp innsida av kapellet og testa ut ulike våpen.
«Dette er ikkje eit angrep på kyrkja eller religion, det er ikkje bodskapen. Bodskapen er at det ikkje er nokon bodskap», skreiv ho.
Trygla om hjelp
Westman skreiv også om eit ønske om å bli ferska.
«FINN MEG EG TRYGLAR OM HJELP, EG SKRIK ETTER HJELP» står det i notatboka, ifølge BBC.
I dagboka skriv ho også om depresjon og sjølvmordstankar som ho skal ha hatt i fleire år.
«Eg kan ikkje snakke med ein psykolog eller med familien, for dei vil rapportere det inn og sette meg på ei overvakingsliste» skreiv ho.
Robin Westman i YouTube-manifestet.
Foto: Robin Westman via YouTube / Reuters / NTBSå langt er ikkje mykje informasjon om bakgrunnen til Westman delt, anna enn at ho tidlegare hadde gått på skulen som høyrer til kyrkja. Etterforskarar har også stadfesta at mora hennar jobba der.
FBI-direktør Kash Patel var tidleg ute med å informere på X om at Westman var fødd mann under namnet Robert. Rettsdokument viser at mora søkte om å endre namnet til Robin ettersom ho identifiserte seg som kvinne, skriv Minneapolis Star Tribune.
Interessert i nyheiter frå utlandet? Høyr utanriksredaksjonen sin podkast her:
Publisert 29.08.2025, kl. 08.12