Dette møter Brann i Europaligaen: Følg trekninga frå klokka 13.00

Klokka 13.00 i dag kjem svaret på kven Brann skal møte i Europaligaen.

Bland dei 35 laga Brann kan trekke opp av hatten er store namn som Roma, Aston Villa, og Lyon.

Medrekna Brann er det 36 lag fordelt på fire grupper som skal trekke motstandarar i dag. Brann skal trekke to motstandarar frå kvar gruppe, og skal møte fire borte og fire heime.

Dermed er bergensarane garantert minst åtte kampar i årets Europaliga, og potensielt endå meir om dei skulle ta seg vidare til utslagsrundane etter ligaspelet.

Dei er òg garantert litt pengar. Kor mykje er vanskeleg å seie no, seier dagleg leiar Christian Kalvenes, men han anslår at det er snakk om 40-50 millionar kroner.

Til samanlikning er Bodø/Glimt sikra 347 millionar etter at dei tok seg vidare til Meisterligaen.

Draumen om Roma

Dagleg leiar i Brann, Christian Kalvenes, er til stades på trekninga i Monaco i dag.

Om supporterane får det så det vil, må han snart bytte ut rivieraen med «den evige stad».

– Dei har eit sterkt ønske om å møte Roma, som har ein stor arena og direkterute frå Bergen. Å møte ein stor motstandar som kan huse mange bergensarar hadde vore utruleg kjekt.

Men uansett kvar i Europa reisa går til, reiser dei ikkje berre for ein bergensk gruppereise.

– Me er her for å lære og for å ta dei neste stega. Men draumen er å ta seg vidare, seier Kalvenes før trekninga.

– Det er ein flott bukett med store klubbar her, så det blir fantastisk uansett.

Første kvalifisering til Europa på 17 år

Sist gong Brann karra seg gjennom kvalifiseringskampar til ordinært Europa-spel var i 2008.

Sidan den gong har turneringa skifta namn til Europaligaen, og Brann har skifta trenar sju gonger.

Dei siste åra har det vore nære på, men ikkje heilt, for dei raudkledde.

Sist under Eirik Horneland, som var nære på to år på rad, men vart felt av høvesvis straffekonk og tabbemål.

Dermed har relativt ferske Freyr Alexandersson gitt bergensarane ein sjeldan anledning til å sprenge reisebudsjettet i år.

Og dei som allereie vil merke av kalenderen kan notere seg kampdatoane under:

– Gjer at me slepp å selje spelarar til Glimt

I tillegg til erfaring og festdagar i Europa fører kvalifiseringa med seg greie summar for Bergensklubben.

Kalvenes anslår at det er snakk om 40–50 millionar norske kroner.

Det kan kome godt med for ein klubb som prøver å halde tet med Bodø/Glimt, som sikra seg minst 347 millionar då dei tok seg til Meisterligaen.

– Det er utruleg viktig for oss å skape oss eit økonomisk fundament som gjer at me slepp å selje våre beste spelarar til Bodø/Glimt, seier Kalvenes

Han samanliknar den potensielle situasjonen med Rosenborg sin tidlegare dominans i norsk fotball.

– For 20 år sidan skapte Rosenborg seg eit hegemoni, med at dei hadde ein økonomi som gjorde at dei kunne dominere dei andre ved å kjøpe opp spelarane deira.

– Med den økonomien me no får i botn, får me moglegheita til å ha kontroll sjølv og forme vår eigen utvikling, seier han.

Likevel utelukkar han ikkje at dei tar ein telefon til Bodø-Glimt for å hausta erfaringane deira etter at dei tok seg til semifinalen i Europaligaen i fjor.

– Me er flinke på den delingskulturen i Noreg, så det kjem me nok til å gjere. I alle fall om me møter motstand som dei har møtt før oss.