Cyber­angrep mot europeiske flyplassar

Cyberangrepet er retta mot leverandøren av innsjekkingssystem.

Angrepet gjer at automatiserte system ikkje fungerer.

Dermed må prosedyrar knytt til innsjekk og ombordstiging bli gjennomført manuelt.

Det førar til forseinkingar ved fleire europeiske flyplassar.

Hendinga skjedde fredag kveld.

– Forsøker å løyse problemet

Brussel lufthamn er blant dei råka flyplassane.

Ti flygingar har blitt kansellert og 17 flygingar har blitt forseinka i Brussel, melder Sky News.

– Dette har stor innverknad på flyplanen og vil dessverre føre til forseinkingar og kanselleringar av flygingar, skriv Brussel lufthamn på sine nettsider.

– Leverandøren jobbar aktivt med saka og forsøker å løyse problemet så raskt som mogleg, legg dei til.

Lengre ventetid

Brandenburg lufthamn i Berlin og Heathrow lufthamn i London melder også om problem.

Lufthamnene melder om lengre ventetid ved innsjekking.

Heathrow ber reisande om å sjekke status til flyginga si før dei kjem til flyplassen. Fleire avgangar er forseinka, melder Sky News.

Det er leverandøren Collins Aerospace som opplever tekniske problem, melder Heathrow lufthamn på X.

Det er uvisst når problemet blir løyst.

Avinor er ikkje råka

NRK har vore i kontakt med Avinor som opplyser at dei ikkje er råka av angrepet.

– Avinor og våre system er ikkje råka av dette.

Det seier pressevakt i Avinor Carita Storm Røsaasen til NRK.

Røsaasen fortel at dei ser nokon forseinkingar frå innkommande trafikk, der feilen har blitt rapportert.