Brann i hus og garasje i Øygarden: – Kontroll på bebuarar

Det brenn i eit hus og ein garasje i Øygarden kommune, melder brannvesenet kl. 17.02.

Brannen skal ha starta i garasjen, der det står elbilar parkerte, og deretter spreidd seg til huset, ifølge politiet.

– Det er dialog med og kontroll på bebuarane i huset som brenner, melder operasjonsleiar Tore-Andre Brakstad i Vest politidistrikt klokka 17.19.

Brannvesenet har sett i gang sløkking av brannen, og har fjerna gassflasker frå nærliggande bygg.

Hus og garasje overtent

– Garasjen og tilstøytande bygning er tilnærma overtent, seier Børre Brekkvassmo i 110 Vest.

Brannvesenet har mannskap frå fem stasjonar på staden.

Det er sterk røykutvikling i området.

Politiet ber difor bebuarar om å lukke dører og vindauge og stenge ventilasjonen.

Naudetatane rykker ut til staden. Politiet er framme og er i gang med å evakuere nabohusa, melder dei klokka 17.15.

Klokka 17.11 var brannvesenet ennå ikkje framme på staden, og visste ikkje om det var folk i huset.

– Men vi har fått mange telefonar om brannen, seier Brekkvassmo i 110 Vest.

Vitne høyrde høge smell

Eit vitne på staden meiner det såg ut som brannen starta i garasjen.

– Eg såg at det byrja å ryke litt, og så tok det seg kraftig opp ganske fort.

Han høyrde fleire høge smell.

– Det var nesten som eit børseskot. Det small eit par gongar medan eg stod der.