Ambulanse på utrykking kolliderte med Bybanen

– Det er opplyst at det ikkje skal vera personskadar, verken på Bybanen eller dei som sat i ambulansen, melder politiet.

Naudetatane rykte ut til staden, der det blei trafikale utfordringar og kø.

Politiet opplyser at dei jobbar med å avklara kva som har skjedd. Dei avhøyrer dei involverte partane og vitne på staden.

– Ambulansen var på utrykking og på veg til ei hending, skriv Tommy Nybakk i Helse Bergen til NRK.

Han opplyser at det ikkje var nokon pasientar i ambulansen.

Det var BT som melde om ulukka først.

Bybanen går som normalt igjen

Brannvesenet melder at dei bidreg med å med sikring av skadestaden, bilen og bana.

I retning mot Åsane var vegen stengd, men er no open att. Det er framleis trafikale utfordringar, melder politiet.

– Bybanen har rygga vekk, så den ser ut til å kunna køyra sjølv. Den stod på skjenene og har ikkje spora av, seier Jostein Steinsland-Hauge i brannvesenet til NRK.

Han seier at ambulansen måtte hentast av bilbergar.

Vegtrafikksentralen opplyser til NRK at både bybanen og ambulansen er fjerna frå staden.

Bybanen linje 1 mellom Byparken og Flesland går no som normalt, men det er forseinkingar etter tidlegare omkøyring, melder Skyss.

Ambulansepersonell til legesjekk

Nybakk i Helse Bergen opplyser at dei ikkje kan uttala seg om årsaka til ulukka på noverande tidspunkt.

– Korleis går det med personane i ambulansen?

– Tilsynelatande går det bra med personellet. Dei er til legesjekk no.

Han viser til at dei har etablerte rutinar for å følgja opp slike hendingar.

– Det viktigaste for oss er å ta vare på personellet som var involvert. Utover dette vil me på eit seinare tidspunkt gå gjennom hendinga saman med relevante instansar.