Ute av Meisterligaen etter straffedrama: – Fullt fortent

Vitinha, Gonçalo Ramos, Ousmane Dembélé og Désiré Doué scora for PSG i straffekonken, medan berre Mohamed Salah gjorde det same for Liverpool.

Darwin Núñez og Curtis Jones bomma for Liverpool, som dermed er ute av den gjæve klubbturneringa.

– Fullt fortent at Liverpool ryk ut, sa TV 2-ekspert Jesper Mathisen.

Uventa trøbbel

I Premier League leiar Liverpool med heile 15 poeng på næraste utfordrar Arsenal, som rett nok har ein kamp til gode.

Også i grunnspelet i Meisterligaen var Liverpool overlegne med sju av åtte moglege sigrar.

1/8-finalen, over to kampar mot franske PSG, viste seg å bli langt tøffare.

PSG-sjansar

Beraldo og Désiré Doué hadde begge gode sjansar for PSG tidleg i første ekstraomgang.

I andre ekstraomgang hadde Ousmane Dembélé ein stor sjanse som Liverpool-keeper Alisson redda fint.

– Utruleg nervøs stemning på Anfield no, sa TV 2-ekspert Jesper Mathisen i andre ekstraomgang.

Men ein dramatisk 1/8-finale i Meisterligaen måtte til slutt altså avgjerast på straffesparkkonkurranse.

Mot spelets gang

I det første oppgjeret i Paris var det PSG som skapte sjansane, men berre Liverpool som scora.

At dei elles så solide engelske ligaleiarane vann 1–0 vart rekna som svært ufortent.

I returkampen på Anfield skifta derimot laga både på å ha initiativet og å skape sjansar.

Mohamed Salah brente to sjansar tidleg.

– Han burde ha scora på begge, meinte tidlegare Liverpool-spelar Stephen Warnock på BBC Radio 5 Live si sending.

Like etter sjansane, i det 12. minutt, sende Ousmane Dembélé bortelaget i leiinga etter å ha pirka ballen i mål frå kort hald.

Liverpool tok over

Etter scoringa losna det spelemessig for PSG, som skapte fire store sjansar før pause.

Anten vart avslutningane for dårlege, eller så stod Liverpool-keeper Alisson i vegen.

Etter pause var det derimot Liverpool som tok over spelet igjen.

Før det var spelt 60 minutt hadde dei brent to store sjansar, i tillegg til ei nettkjenning frå Dominik Szoboszlai vart annullert for offside.

Liverpool hadde eit bra spelemessig overtak utover i omgangen, utan å kome til dei heilt store sjansane.

Rett nok vart det blåst for offside då Jarell Quansah heada i stonga, utan at TV-bileta gav noko godt svar på kvifor.

– Dei har hatt marginane med seg denne omgangen, men dei har jobba for dei marginane også, sa TV 2-kommentator Øyvind Alsaker om PSG.

Skremmeskot frå «Kvaradona»

PSG skapte lite i 2. omgang.

Georgiske Khvicha Kvaratskhelia, ofte berre kalla «Kvaradona» kunne derimot ha sendt PSG til kvartfinale tre minutt før full tid.

Langskotet hans gjekk derimot like over lengste kryss.

– Begge laga har mista energien, sa TV 2-ekspert Jesper Mathisen om utviklinga utover i 2. omgang.

Men det gjekk altså til ekstraomgangar.