Ungdom har starta fleire brannar: – Ei utvikling vi overhovudet ikkje ønsker oss

– Vi skal vere sjeleglad for at det gjekk så bra som det gjekk og at det berre er materielle skader og ikkje på personar.

Det seier kommunedirektør i Stjørdal, Bente Næverdal. NRK treff ho utanfor bygarden i sentrum som stod i full fyr i går.

Fredag morgon blei det klart at fire unge gutar er sikta for å ha starta brannen.

Det er tredje gong på nokre år at store bygningar har blitt påtent av mindreårige i Stjørdal.

– Det er ei utvikling vi overhovudet ikkje ønsker oss, seier Næverdal.

Fleire påtente brannar

Brannen starta ved 15.45-tida torsdag. Naudetatane rykka ut med store ressursar og bygningane blei evakuert.

– Patruljen på staden melder at det er full overtenning i eit treetasjes bygg på staden, skreiv operasjonsleiar Einar Røstum.

Bebuarar i bygget som brann og nabobygget blei evakuert.

I 17-tida kunne brannvesenet melde at dei hadde fått kontroll på brannen.

I oktober i fjor brann det i Halsen skule i Stjørdal. Den gongen tilstod to ungdommar å ha tent eit bål i tredje etasje i den gamle skulen.

I 2024 fikk Stjørdal stasjon store brannskadar etter at tre ungdommar hadde tent på.

Seinare same år brann stasjonen heilt ned. Politiet har gitt opp å finne ut kva som var årsaka til brannen.

Brannen på onsdag er dermed den tredje brannen i Stjørdal som mindreårige står bak.

– Det viser oss at vi må fortsette å satse på førebygging, seier Næverdal.

– Når slike ting skjer er det sjølvsagt tett dialog mellom politi og barnevern. Det er jo ein jobb som går føre seg no også.

– Har du nokre tankar om kvifor det har blitt sånn på Stjørdal?

– Nei, det har eg ikkje.

– Det blir gjort ein god jobb med førebygging, men vi må berre fortsette det gode arbeidet, for dette er ikkje snudd over natta.

Tente opp grill på taket

– Dessverre så ser vi i Stjørdal og også andre plassar at unge folk tar seg inn stadar dei ikkje skal vere og gjer ting som framstår som morosame, men som blir skadeverk.

Det seier etterforskingsleiar Ellen Mari Burheim.

– I verste fall kan det føre til fare for andres liv og helse

Burheim fortel at dei fire ungdommane no har blitt avhøyrd.

– Vi har fire mindreårige gutar under strafferettsleg alder som har knytt seg til staden.

Dei er sikta for aktlaust å ha starta brannen.

Burheim fortel at gutane har forklart at dei tente opp ein grill på takterrassen og elden kom ut av kontroll.

– Det kunne ha gått skikkeleg ille. No ser det ut til at det berre er materielle skader.

– Det bur jo folk her. Det var stor bekymring rundt det ein stund.

Sidan ungane er under strafferettsleg alder vil dei bli følgd opp i «det førebyggande sporet», seier Burheim.

– Det er snakk om å kople på skole, barnevern og jobbe for å forsøke å forhindre at dette er noko dei gjer igjen.

– Uerstattelege historiske verdiar

– Det er uerstattelege historiske verdiar, fortel Jan Erik Sundøy, styreleiar i Stjørdal historielag.

I kjellaren i bygget som brann torsdag ligg historielaget sitt fotoarkiv med historiske bilete frå området.

– Vi har komplette arkiv frå så å seie alle fotografar som har operert i Stjørdal dei siste 100 åra, seier Sundøy.

– Til saman er det godt over ein million enkeltbilete.

Delar av biletsamlinga i kjellaren skulle etter planen bli sendt til Trøndelag Folkemuseum for å bli oppbevart der.

– Men så langt hadde vi ikkje kome før det tragiske skjedde i går, fortel Sundøy.

Brannen blei sløkt fort nok til at biletsamlinga ikkje blei skadd.

– Her handlar det om uerstattelege kulturhistoriske verdiar som historielaget har lagra.