TV 2: Jørn Eggum fekk forhandle sluttavtale med lokalleiar han hadde hatt forhold til

Jørn Eggum ligg an til å bli vald som LO-leiar neste veke. I dag er han leiar for det mektige Fellesforbundet.

I ei sak frå TV 2 måndag fortel dei at Eggum har tilbode ein teieavtale og eitt års etterlønn til lokalleiar Merethe Solberg.

28. januar i 2025 bestemte forbundsstyret i Fellesforbundet, som Eggum er leiar for, at Solberg si avdeling skulle bli sett under administrasjon. Det skriv TV 2, som først var ute med denne saka.

Ho blei difor fråteken alle sine verv i forbundet.

Bråk innad i avdelinga skal vere bakgrunnen for at ho er blitt sett under administrasjon.

Fleire som kanalen har prata med seier at konfliktane i avdelinga oppstod før Solberg kom inn som leiar.

Overfor VG bekreftar valkomiteen at saka vil bli tema i valkomiteen i LO i dag.

– Det blir eit tema, utover det vil eg ikkje seie noko meir. Eg har ikkje kommentert eller vil kommentere valkomiteens arbeid. Vi skal diskutere alt og er opptekne av å finne ein god LO-leiar – og det skal vi klare, seier valkomiteens leiar Mette Nord til VG.

Etter det NRK forstår har valkomiteen allereie hatt eit digitalt møte.

Forhandla direkte med ho

TV 2 møtte Eggum måndag kveld.

Der bekrefta han at han bad om og fekk fullmakt frå sitt eige forbundsstyre til å forhandle direkte med Solberg. Likevel avviser han til dei at det er snakk om ein sluttavtale.

Likevel seier han at han no ser at hans rolle i saka kan ha vore uryddig.

Dei to møttest først i 2017 og innleia eit seksuelt forhold.

Då var ho hovudtillitsvald og medlem i Fellesforbundet avdeling 10. I 2018, medan dei framleis hadde ein relasjon, blei ho leiar for denne avdelinga. Deira relasjon blei avslutta i 2022.

Angrar i dag

Ho møtte Eggum då ho var hovudtillitsvald for kokkane på Ikea Slependen. Ho var på det tidspunktet medlem i Fellesforbundets avdeling 10.

Han tok kontakt med ho på fleire tidspunkt etter dei først møttest, og dei innleia deretter eit seksuelt forhold.

Dette har Eggum bekrefta til TV 2.

Solberg seier at sexen var frivillig.

Likevel seier ho at ho i etterkant har angra på relasjonen til Eggum.

– Eg skulle ønske eg klarte å stå mot det å møte Jørn, og at det blei ein slik type relasjon. Det skulle eg ønske eg ikkje hadde gjort. Det er verkeleg noko eg skammar meg over. Eg synest det er flaut, seier ho til kanalen.