Turistane klatrar over gjerda: – Dei har eit dødsønske

Rundt 800.000 turistar lar seg lokke til naturperla Geiranger årleg. Samtidig sit fleire med hjartet i halsen.

I turistbygda finn ein nemleg stupbratte Flydalsjuvet. Eit utsiktspunkt der mange vil ta spektakulære bilde til sosiale medium.

Dei klatrar utanfor gjerda som er sette opp, sjølv om berre eitt feiltrinn der kan få fatale konsekvensar.

– Det er openbert at det å stå utanfor kanten på ei 100 meter høg kløft, det er livsfarleg.

Det seier tidlegare politibetjent Svein Harsjøen, som no jobbar som bussjåfør og fraktar turistane opp dit kvar dag i sommar.

Han er glad for at det er sett opp gjerde, men meiner det ikkje er nok.

– Ein kan ikkje beskytte folk mot å vere dumme eller tjukke i hovudet. Det er umogleg. Spørsmålet mitt er, gjer vi nok for å rettleie gjestane der oppe, så dei ikkje gjer feil?

Tok sjansen og klatra over gjerda

Éin av turistane som har tatt turen denne dagen er Michael Wong frå USA. Han synest det er nydeleg i Geiranger, og samanliknar det med Alaska.

Men også han observerer folk som går utanfor gjerda.

– Dei har eit dødsønske. Det er «crazy». Folk burde følge reglane – det er derfor det er gjerde. Viss dei skadar seg, må alle komme og redde dei.

To av dei som klatra over gjerda er Viktor og Elonna Somov frå Estland. Dei tok også med seg dottera.

– Det var litt skummelt, men det var greitt fordi vi tok risikoen. Det er jo ikkje så trygt, men du kan gå dit og ta bilde viss du tenker over risikoen.

– Kvifor tok de risikoen?

– På grunn av bilda. Vi ville ta dei gode bilda. På internett er det mange bilde frå den staden, og vi ville ta dei same.

– Men kva med gjerda som er sette opp?

– Dei er små. Dei er ikkje så trygge. Dei burde sett opp større gjerde eller plakatar viss ein ikkje vil at folk skal gå der.

– Litt informasjon hadde vore fornuftig

– Det gir eit adrenalinkick. Det er jo det ein er på jakt etter når ein går ut for å ta eit sånt bilde.

Det seier Even Vardaasen, som i dag heldt seg bak gjerda – men som tidlegare har hoppa over og tatt eit bilde.

– Tenkte du då på risikoen ved å falle utanfor?

– Ein gjer jo alltid det, men det er på same måte som når ein går fjellturar, klatrar eller går rundt i naturen, så er ein jo på stadar der det er mogleg å falle. Og det er det her òg.

Det siste bildet ble tatt da Even Vardaasen var ved Flydalsjuvet sist.

Remi Sagen / NRK og privat

Han synest ikkje gjerda er noko hinder.

– Det er fint at det er der, men litt informasjon om risikoen ved å krysse gjerdet hadde jo vore veldig fornuftig.

Vardaasen seier blant anna at han ikkje har sett noko som tilseier at det er forbode å gå forbi.

Vurderer tiltak

Bussjåfør Svein Harsjøen meiner kommunen bør sette inn personar til å rettleie turistane og dei besøkande, og forhindre at dei går utanfor gjerda.

Ordførar i Stranda kommune, Einar Arve Nordang, seier at det ikkje har blitt vurdert endå, også fordi det vil koste pengar.

Han seier at dei då i tilfelle må ta betalt for parkering for å hente inn inntekter frå ein stad.

– Det er tusenvis av fjellturistar som går i fjellet på Sunnmøre og i Møre og Romsdal. Det skulle tatt seg ut om det offentlege skulle måtta inn og sikre alle plassar der det er mogleg å skade seg. Då hadde vi ikkje fått gjort noko anna.

Nordang seier likevel at det kan hende dei må vurdere det her.

– Det er openbert at turistane genererer store mengder med pengar inn, men eg trur kostnaden ved at nokon fell utanfor er betydeleg større – både økonomisk og menneskeleg, seier bussjåføren.