Trump set inn nasjonalgarden i Washington: – Vi skal ta hovudstaden vår tilbake

Det kunngjer Trump på ein pressekonferanse måndag ettermiddag.

800 soldatar frå Nasjonalgarden vil bli sende til hovudstaden.

– Vi skal ta hovudstaden vår tilbake, seier presidenten.

Presidenten vil sette inn Nasjonalgarden for å «gjenopprette lov og orden», og politiet i byen blir plassert under føderal kontroll.

Til stades på pressekonferansen var også:

• Innanriksminister Doug Burgum
• Forsvarsminister Pete Hegseth
• Justisminister Pam Bondi
• FBI-direktør Kash Patel
• Føderal statsadvokat Jeanine Pirro

Bakgrunnen er Trump sine utsegn om at byen sin kriminalitet er «ute av kontroll».

Lågaste valdskriminalitet på 30 år

Men ifølgje tal frå politiet i Washington har valdskriminalitet gått ned med 26 prosent dei første sju månadane i 2025. Den totale kriminaliteten gjekk ned med 7 prosent, melder nyheitsbyrået Reuters. Dei baserer seg på det lokale politiet sin statistikk.

I pressekonferansen seier Trump at han vil frigjere nasjonen sin hovudstad frå kriminalitet, kaos og elende.

Den demokratiske borgarmeisteren i Washington, Muriel Bowser, har uttalt at valdskriminaliteten er den lågaste på 30 år, melder Reuters.

Presidenten seier vidare at innsatsen mot kriminalitet vil byrje i hovudstaden, men at han vil slå ned på kriminalitet også andre stadar i landet – som New York og Chicago.

Alle tre byane er leia av Demokratane.

Nasjonalgarden mot demonstrantar

I juni sette Trump Nasjonalgarden inn mot demonstrantar i Los Angeles.

Folk demonstrerte mot Trump sin lovnad om massedeportasjonar av papirlause innvandrarar.

Demonstrantane kravde at deportasjonane og arrestasjonane skulle stanse.

Donald Trump meinte det var naudsynt å sette inn soldatar frå Nasjonalgarden – noko lokale styresmakter var ueinige i.

Etter hendinga sende demokratiske guvernørar frå fleire delstatar eit felles fråsegn der dei omtalte Trump sitt vedtak som eit maktmisbruk.