Trump: – Eg er ikkje tilhengar av pave Leo

USAs president Donald Trump er misnøgd med pave Leo XIV.

– Dersom eg ikkje var i Det kvite hus, hadde ikkje Leo vore i Vatikanet, skriv presidenten på Truth Social.

Trump meiner at paven bør fokusere på jobben sin som pave, framfor å forsøke å vere ein politikar.

Paven har omtalt konflikten i Iran som «frykteleg», og meiner at Gud ikkje tar i mot bønner frå leiarar som byrjar krigar og har «hendene fulle av blod».

Følg utviklinga i Midtausten her:

Vil ha slutt på krigen

Gjennom påsken har paven snakka om ønsket om fred.

Laurdag oppfordra han mektige leiarar om å legge ned våpena.

– Nok av avgudsdyrking av sjølvet og pengar. Nok av maktdemonstrasjonar. Nok av krig, sa paven.

– Måtte galskapen av krig ta slutt og jorda bli tatt vare på og dyrka av dei som framleis veit korleis å skape, verne og elske livet, la han til.

Trump kom først med eit svar til paven sine utsegn søndag.

– Eg synest ikkje at han gjer ein veldig god jobb. Han likar kriminalitet, trur eg, skriv Trump.

– Eg er ikkje ein stor tilhengar av pave Leo. Han er ein veldig liberal person, han er ein mann som ikkje trur på å stanse kriminalitet, seier presidenten til Reuters.

Trump hevdar at paven i sin bodskap uttrykker at det er greitt for land å ha atomvåpen, og at han ikkje uro for kriminalitet i amerikanske byar.

– Eg vil ikkje ha ein pave som kritiserer USAs president fordi eg gjer akkurat det eg blei valt til, skriv Trump på sitt eige sosiale medium.

Trump som Jesus-figur

Pave Leo XIV, Robert Francis Prevost, blei valt til katolikkane sin leiar i mai 2025, etter at pave Frans gjekk bort i påsken same året.

Den første amerikanske paven var ikkje blant favorittane i forkant av valet av ny pave, men fleire har trudd at Prevost kan bli ein ny fredspave.

Trump var rask med å gratulere den nye paven og syntest valet var ei «stor ære».

No er tonen ein litt anna.

– Leo bør vere takksam fordi, som vi alle veit, var han ei sjokkerande overrasking, skriv Trump.

Trump hevdar at det er hans forteneste at Prevost no sit som pave.

– Han stod ikkje på noka liste over pavekandidatar, og blei berre sett der av kyrkja fordi han var amerikanar og dei trudde det ville vere den beste måten å handtere Donald J. Trump på.

Kort tid etter presidenten sin kritikk mot paven, publiserte han eit bilete av seg sjølv som ein Jesus-skikkelse som kurerer ein mann.

Bodskap for Maga-rørsla

Presidenten har den siste tida vekt oppsikt etter fleire sterke utsegner på sosiale medium.

Dei siste vekene har han kome med sterke truslar mot Iran.

– Ein heil sivilisasjon kjem til å døy i kveld, og aldri komme tilbake, skreiv Trump tysdag førre veke på Truth Social.

Språket er meint for presidenten sine følgarar i Maga-rørsla, men er med på å svekke hans karakter, ifølge retorikkekspert Kjell Terje Ringdal.

Les meir om presidenten sin retorikk her:

Interessert i det som skjer i verda? Høyr Urix sin podkast her: