Tok fram mobilen under kamp – bildet hans skaper overskrifter

– Det er ingen som har gjort dette før dei, seier Christer Francke.

Han er ekspert i Warner Bros. Discovery og har den siste veka blitt vitne til ein noko spesiell trend i tennisen:

Først var det verdseinar Aryna Sabalenka som drog fram mobilen under grusturneringa i Stuttgart. Søndag blei det reprise da verdstoar på herresida, Alexander Zverev, gjorde det same i Madrid Open.

TV-bilda frå den spanske hovudstaden viser at tyske Zverev var heilt ueinig med det den elektroniske linjedømminga, som meinte ballen var inne.

Han gjekk deretter bort til bagen sin, henta ut mobilen og knipsa eit bilde av avtrykket til ballen i grusen.

Dommaren svarte med å gi tyskaren ei åtvaring for usportsleg åtferd.

Etter kampen la 28-åringen bildet ut på Instagram-kontoen sin med teksten:

– Eg berre legg denne her. Denne blei dømt inn. Interessant avgjerd.

– Eg er ikkje galen

Bildet til Zverev viser at merket frå ballen er nokre centimeter på utsida av den kvite linja.

Episoden har fått stor merksemd i verdspressa det siste døgnet. På sosiale medium spør fleire korleis det elektroniske verktøyet Hawk-Eye klarte å dømme ballen inn.

– Eg trur ærleg talt det var ein defekt i systemet. Det var ein feil i systemet i den augeblinken, sa Zverev på pressekonferansen etter kampen, ifølge Reuters.

Zverev understrekar at han vanlegvis liker verktøyet, men at han i dette tilfellet vart sett ut avgjerda.

– Det er ikkje akkurat éin millimeter inn eller éin millimeter ut, det var fire–fem centimeter. Det var derfor eg gjekk til dommaren og sa «ver så snill, kom ned for å sjå på dette, eg er ikkje galen», seier han.

Ifølge spelaren sjølv risikerer han ei saftig bot for å ha tatt med mobilen ut på banen.

• NRK har bede om ein kommentar frå Madrid Open og ATP, men har foreløpig ikkje fått svar.

Trur grusen er grunnen

Hawk-Eye har blitt brukt i TV-sende tenniskampar i mange år. Det er likevel først i år at ATP har tatt i bruk verktøyet på alle turneringane sine – også grusturneringar.

Christer Francke trur Zverev blei inspirert av Sabalenka.

– Dei gjer nok dette for å få eit bevis og for å seie at ein bør ha fysiske linjedommarar på grus inntil systemet blir heilt vasstett på det underlaget òg, seier tenniseksperten.

– Kva er grunnen til at verktøyet kanskje ikkje fungerer like bra på grus?

– Grusen er i rørsle, og det ligg kanskje noko grus på linja. Så i enkelte vinklar ser ballen ut til å vere god, sjølv om merket er ut, svarer han.

Kontroversane til trass – Zverev tok seg greitt vidare frå kvartfinalen mot Alejandro Davidovich Fokina og møte tysdag argentinske Francisco Cerundolo.