Togstasjon treft av ras - Raumabanen blir stengd ut sommaren

Eit større ras på laurdag ved Verma førte til at Europaveg 136 blei stengd. Skadane har ført til at togstasjonen som ligg ved vegen er heilt ute av drift.

Det er eit ras på 50 meter i breidde og 2 meter i høgde. Raset skal ha treft både oppsida, nedsida og midten av stasjonen.

– Den vil vere ute av drift fram til 31. august, men det er også mogleg at dette kan endre seg basert på dei ulike forholda ein må ta stilling til, fortel pressevakt ved Bane nor Harry Korslund.

Det er også ein del sikkerheitstiltak som må gjennomgåast.

– Det er nødvendig å få kartlagt risikoen for nye ras. Tryggleiken for de mannskapa som skal gjere den jobben er viktig.

Korslund anbefaler reisande å sjekke ut reiseapper og informasjon som togselskapet har tilgjengeleg på sine heimesider.

Godstrafikken ute av drift

Bana er ifølge Bane nor ikkje klar for bruk før 1. september

Henning Aandal er leiar for Onrail som driv varelevering via jernbana.

Tidlegare i år var også Dovrebanen stengd, som Raumabanen er knytt til. No mistar Møre og Romsdal på ny si einaste togsamband inn og ut av fylket.

– Det er veldig alvorleg, at vi som driv med gods må legge ned den ruta igjen, seier Aandal.

Dei fraktar matvarer, brus, øl, gass til sjukehusa og mykje anna for ulike kundar.

– Kundane må sjølv finne ledige lastebilar, og det er ikkje sikkert det er så lett no i fellesferien, seier Aandal.

Fungerande ordførar Jan Petter Valde var overraska at Raumabanen blir stengd så lenge.

– Det er synd at det er ein ny runde med stenging, det er ille. Det vil særleg få konsekvensar for godtransporten, men og turisttoget, seier Valde.

Buss for tog

Det kjem til å bli sett opp alternativ transport for reisande. Sjølve vegen er open, men jernbanestrekninga er øydelagt.

Pressekontakt ved SJ Nord Widar Lian fortel at det er snakk om større skader.

– Det kjem til å ta tid før bana er i gang att.

Raset får store konsekvensar for dei som skulle ha reist med toget strekninga Dombås–Åndalsnes.

– Konsekvensane er at passasjerar må reise med buss. Spesielt no i sommarsesongen med mykje turisme er det ikkje så kjekt, forklarar Lian.

– Folk har forståing for hendinga, legg han til.