To tenåringar tiltalte for å ha øydelagt synet til Sindre (23) med rakett

Nyårskvelden blei ikkje heilt slik Sindre Fiske (23) hadde tenkt. Han var på fest i Surnadal på Nordmøre og då det nærma seg midnatt gjekk han og kameratane ut. I eit vegkryss like ved hadde det samla seg mykje folk.

Der var det kaotisk.

– Det var heilt texas og mange villbassar som fór og fyrte fyrverkeri både på kryss og tvers i rundkøyringa. Vi trekte oss litt unna og stod og prata. Plutseleg så small det i ansiktet på meg, fortalde Fiske til NRK tidlegare i år.

For smellet i ansiktet viste seg å bli alvorleg for 23-åringen.

– Synet blei redusert til 50 %

Berre eit par dagar etter nyttårsfeiringa bestemte politiet seg for å opprette ei straffesak. No er ein 18-åring og ein 19-åring tiltalte i saka, den yngste for å ha skote ein rakett inn mot ei folkemengde, den eldste for å ha gitt han raketten og bedt han fyre av mot området med folk:

«Sindre Fiske fikk raketten eller fragmenter fra eksplosjonen i høyre øye. Det oppstod brudd i øyehulen og synet ble redusert til 50 %, noe som igjen utløste vedvarende utmattelse ved konsentrasjon og tidvis hodepine ved arbeid og lesing», heiter det i tiltalen.

Ifølgje advokatane til dei to tiltalte vedgår ingen av dei straffskuld.

Trudde han miste synet fullstendig

23-åringen blei sendt rett til sjukehus i Trondheim. Augetestar viste at han ikkje var blind, og truleg kan han takke vernebrillene han hadde tatt på, for det.

Men synet er svekt, og i fleire månader var 23-åringen sjukmeld med hovudverk, utmatting og konsentrasjonsvanskar, ifølgje tiltalen.

– Det er eit voldsomt skadepotensiale i ei slik sak og ein ser sjølvsagt alvorleg på det. Dett er ei heilt unødvendig handling som det er grunn til å slå hardt ned på, seier statsadvokat Jogeir Nogva, som har tatt ut tiltalen.

Totalt fekk ti personar augeskadar i samband med nyttårsaftan. Sindre Fiske var den einaste av dei som brukte vernebriller, ifølgje ei oversikt frå Haukeland universitetssjukehus rett etter nyttårsaftan.

Sindre Fiske ønskjer ikkje å kommentere tiltalen mot dei to unge mennene.

Vurderer forbod mot fyrverkeri

Dei to tenåringane som er tiltalte for å ha fyrt av fyrverkeriet – eller medverka til dette – må møte i retten om to veker.

I etterkant av ulykka i Surnadal tok ordførar Hugo Pedersen (Sp) til orde for eit forbod mot fyrverkeri. No seier han det ikkje er aktuelt.

I staden seier han det er viktig å snakke med barn og unge om tematikken.

– Dersom vi hadde lagt ned eit forbod hadde vi kanskje berre skudd problemet til ein annan stad, og ting kunne kanskje kome ut av kontroll endå meir, seier han.

– Men er ikkje du redd for at det skal skje igjen?

– Det uroar meg, så det med haldningsskapande arbeid skal vi ha fokus på mot neste år, seier ordføraren.