To livstruande skadde etter knivangrep: – Ikkje noko som tyder på terror

– To personar er framleis livstruande skadde.

Det seier politiinspektør John Loveless på ein pressekonferanse sundag føremiddag.

Ti personar vart lagt inn på sjukehus etter knivangrepet på eit tog laurdag kveld. Politiet sa seint laurdag at ni personar var livstruande skadde.

Etter å ha fått behandling, vart fire av desse skrivne ut frå sjukehus.

– Det er ei sjokkerande hending. Tankane mine er med familiane og venene til dei skadde, seier Loveless.

– Det er ikkje noko som tyder på at dette er ei terrorhending, seier Loveless.

To menn blei pågripne av politiet etter hendinga. Begge er britiske statsborgarar.

Søndag blei ein 35 år gamal mann lauslaten.

Berre ein person er no mistenkt for drapsforsøk. Det er ein 32 år gamal mann.

Det har ikkje kome meldingar om nokre omkomne.

Væpna politi

Toget var på veg frå Doncaster til King's Cross i London. Det vart stoppa i Huntingdon, omkring 100 kilometer nord for London.

Der gjekk væpna politi inn på toget og arresterte to menn.

Politiet rykte ut klokka 19.42 lokal tid, få minutt etter at toget hadde køyrt frå Peterborough. Det skjedde etter meldingar frå fleire som var om bord.

Ifølge politiinspektør John Loveless tok det åtte minutt frå politiet fekk den fyrste meldinga, til dei hadde pågripe to menn.

Politiet har stadfesta at dei på eit tidspunkt internt omtalte hendinga med eit kodeord for terrorangrep. Dei trakk sidan tilbake dette, skriv mellom anna BBC.

Lokalt politi hadde øvd på denne typen hendingar seinast i førre veke, seier den lokale parlamentsmedlemen Ben Obese-Jecty til Sky News.

Kontraterror-politi deltar òg i etterforskinga.

– Dette er ei sjokkerande hending, og fyrst og fremst er mine tankar med dei som har blitt skadde i kveld og familiane deira, seier politioverbetjent Chris Casey ifølge BBC.

NRK sitt team i Huntingdon har snakka med fleire lokale innbyggjarar i byen. Dei er alle skaka over det som skjedde laurdag kveld.

Mykje blod

Vitnet Gavin fortel til Sky News at han såg personar som forsøkte å koma seg unna angrepet.

– Dei var ekstremt blodige, seier han til kanalen.

Wren Chambers sat på toget då ho høyrde skriking frå ein av dei næraste vagnane. Etter kort tid kom ein mann løpande med eit stort sår på armen.

– Eg trudde det var ein slags halloween-spøk fyrst. Men så ropar han at nokon har ein kniv og at han vart stukken, seier ho til BBC.

Eit anna vitne fortel at han såg fleire blodige passasjerar springe nedover plattforma. Ein av dei, ein mann i kvit skjorte, var «fullstendig dekka av blod», fortel Dean McFarlane til BBC.

Reisande må forventa avlysingar og forseinka tog mellom London og Peterborough ut sundagen, opplyser National Rail.

Trur det er ei isolert hending

– Den førebelse vurderinga er at dette var ei isolert hending, seier forsvarsminister John Healey til Sky News.

Difor har dei heller ikkje heva nivået for terrortrugslar, som for augeblinken vert rekna som «betydeleg»

Healey ber folk om å ikkje spekulera om hendinga og å la politiet etterforska i fred.

– Djupt urovekkande

Storbritannias statsminister Keir Starmer omtalar hendinga som «djupt urovekkande».

– Den forferdelege hendinga på eit tog nær Huntingdon er djupt urovekkande. Tankane mine går til dei som er råka, og eg takkar naudetatane for innsatsen, skriv Starmer på X.

Statsministeren ber folk i området om å følgje råd frå politiet.

– Eg er sjokkert og forferda over togangrepet i går kveld, tankane mine går til offera og redningsarbeidarar, seier kong Charles ifølge Reuters.

Ordførar i Peterborough og Cambridgeshire, Paul Bristow, sine «tankar og bønner går til alle som er råka», skriv han på X.

Bristow reagerer på «fryktelege scener» som har utspelt seg på toget.

Også styreformann i Det konservative partiet, Kevin Hollinrake, skildrar det som «skremmande scener».

– Mine tankar går til offera og naudetatane som handterer denne saka, skriv Hollinrake på X.

Interessert i utanriks? Høyr redaksjonen sin nyaste podkast-episode: