Tiltalt for å ha sperra mann inne og utøvd vald mot han i seks timar

Hendinga skal ha funne stad i Trondheim i fjor sommar.

Ifølge tiltalen fekk den fornærma mannen åtte ribbeinsbrot og ein punktert lunge, samt sår og kutt på store delar av kroppen.

Den eine mannen er i 20-åra, mens den andre er i 40-åra. Dei er begge tiltalt for grov kroppsskade.

Mannen i 20-åra sin forsvarar, Victoria Westrum, fortel at mannen ikkje erkjenner straffskuld etter tiltalen.

Tore Angen er forsvarar for mannen i 40-åra. Angen har ikkje svart på NRK sine førespurnadar.

Skal ha brukt tau, kniv og slagreiskap

I februar må dei to tiltalte mennene møte i Trøndelag tingrett.

Dei skal ha brukt tau, kniv og ulike slagreiskap da dei utøvde valden.

Påtalemakta meiner dei tiltalte mennene sperra mannen inne i ein leilegheit og i fellesskap utøvde vald mot han i om lag seks timar.

Først eit døgn etter at valden stoppa, skal dei ha sørga for at den fornærma mannen fekk helsehjelp.

For dette er dei tiltalt for å ha sett igjen ein annan i hjelpelaus tilstand.

Den fornærma mannen sin bistandsadvokat, Erik Widerøe, fortel at mannen meiner han var sperra inne lengre enn det som er beskrive i tiltalen.

– Han vil kome til å forklare at det gjekk føre seg lengre enn dei seks timane, seier Widerøe.

– Han har fortalt at det var to døgn der han ikkje kom seg unna. Da var det av og på med vald, som han seier.

Det var helsevesenet som varsla politiet etter at dei fekk inn den skadde mannen.

Widerøe fortel at den fornærma mannen var i dårleg fysisk forfatning etter hendinga, men at han no har kome seg godt.

– Psykisk har det ikkje gått like bra, fortel Widerøe.

– Han er livredd. Han har valt å flytte på seg, han tør ikkje bu der han budde.

I tiltalen blir det tatt atterhald om at påtalemakta vil krevje 27 gjenstandar inndratt frå dei to tiltalte mennene.

Det er mellom anna snakk om ei rekke ulike knivar, øks, hamrar og ein pistol.

Var på rømmen

Den eine av dei to tiltalte blei pågripen same dag som den fornærma mannen fekk helsehjelp.

Mannen i 20-åra var på frifot i fleire dagar og var etterlyst av politiet.

Etter fem dagar blei han pågripen i ein bil nord for Steinkjer, etter å ha oppheldt seg på ein hytte i området.

I forkant av pågripinga ville mannen forhandle med politiet.

Mannen sin dåverande forsvarar fortalde at han ønskte å bli lagt inn på rusbehandling og få oppfølging derifrå, heller enn å bli varetektsfengsla.

Politiet avkrefta at dei forhandla med mannen før han blei pågripen.

Også tiltalt for ran

Påtalemakta har også tatt ut ein annan tiltale som skal bli behandla av tingretten i same rettssak.

I denne tiltalen er mannen i 20-åra saman med to andre menn tiltalt for ran og trugslar.

Denne hendinga skal ha funne stad eit år før valdshendinga.

For dette erkjenner mannen i 20-åra delvis straffskuld, opplyser forsvarar Victoria Westrum til NRK.

Farhad Shæriæti er forsvarer for ein annan av dei tre mennene i denne andre tiltalen. Han fortel at klienten hans er kjent med tiltalen, men at han enno ikkje veit korleis han stiller seg til den.

Også den siste mannen sin forsvarar, Jasmin Gheshlaghi, fortel at mannen er kjent med at han er tiltalt, men enno ikkje har tatt stilling til straffskuld.

Rettssaka der begge tiltalene skal bli behandla begynner i Trøndelag tingrett 10. februar.