Stortingsforlik om havbruk: MDG meiner Ap stemmer ned regjeringas beste forslag

Ap, Høgre, Sp, SV, Venstre og Frp inngjekk torsdag forlik i Stortingets næringskomité om Havbruksmeldinga.

I april la regjeringa fram stortingsmeldinga «Fremtidens havbruk - Bærekraftig vekst og mat til verden».

Regjeringa føreslo der mellom anna å vrake dagens «trafikklys-system», der oppdrettarane i ein heil region får auke eller må redusere produksjonen basert på kor stort lakselus-problemet er i regionen.

Oppdrettsselskapa blir i dag altså «straffa eller løna kollektivt».

Tanken bak ordninga var at oppdrettarar er avhengige av kvarandre, fordi sjukdom, lakselus og rømming påverkar selskapa og den totale miljøbelastninga i eit større sjøområde.

Individuell straff og belønning

I staden skal fiskeoppdrettarane nå få «individuelle insentiv»: miljøpåverknaden, dyrehelsa og dyrevelferden på det enkelte anlegget skal avgjera om oppdrettaren får auka eller må redusera produksjonen.

Meldinga vart i april møtt med negative reaksjonar frå ulikt hald.

Men no støttar eit fleirtal på Stortinget hovudtrekka i regjeringa sitt forslag.

Eit breitt politisk fleirtal står nå saman om det dei kallar ei grøn og berekraftig retning framover for Norges viktigaste fornybare eksportnæring.

(Nedst i artikkelen finn du heile avtalen mellom dei seks partia.)

MDG: – Ikkje godt nok

Miljøpartiet dei grøne (MDG) støttar ikkje fleirtalet, mellom anna fordi dei meiner avtalen ikkje gjer nok for å berge villaksen frå utrydding, ikkje inneheld økonomiske insentiv for betre dyrevelferd, og ikkje krev maksimalt fem prosent dødelegheit i oppdrettsanlegga.

Ifølge MDG har fleirtalspartia fjerna dei konkrete forslaga frå regjeringa om å straffe kvart enkelt anlegg med avgifter for tapt fisk (død eller rømt) og avgifter på utslepp av lakseluslarver.

Partileiar Arild Hermstad meiner at Arbeidarpartiet på Stortinget dermed stemmer ned dei beste forslaga frå si eiga regjering.

– Det er veldig merkeleg. Her er det ei tapt moglegheit til å starte oppryddinga av oppdrettsnæringa. Stortinget svekker konkrete innskjerpingar frå regjeringa.

Ministeren: – Tar omsyn til vekst, miljø og dyrevelferd

Fiskeri- og havminister Marianne Sivertsen Næss (Ap) er ikkje einig.

– Ikkje i det heile. Eg opplever og er glad for at vi har fått brei støtte – frå SV til Frp – for ei ny retning for havbruksnæringa. Der klarer ein å ta omsyn til både vekst, miljø og dyrevelferd.

– Men kva har skjedd med dei avgiftene som regjeringa føreslo?

– Stortinget held seg til dei overordna måla og retningen regjeringa ønsker. Men så har fleirtalet ikkje sagt «akkurat den modellen skal vi gå for».

– Kva er viktigast i Havbruksmeldinga?

– At vi er nøydde til å regulere næringa ut frå den faktiske miljøpåverkinga, og at individuelle insentiv skal avgjere om selskapa får vekse eller ikkje. Det har nå Stortinget stilt seg bak.

– Nei til trafikklys

Næss meiner – som havbruksnæringa – at trafikklysordninga har slått feil ut.

– Det medfører at selskap som driftar veldig bra, med låg miljøpåverknad og låg dødelegheit, likevel ikkje får vekse, fordi andre selskap ikkje driftar like godt. Då får heller ikkje kommunane inntektene gjennom Havbruksfondet som er så utruleg verdifulle.

– Så «kollektiv påskjønning eller avstraffing» skal nå vekk?

– Stortinget har sagt at ein skal sikre å få det på plass i løpet av to til fire år. Men fram til vi har avgjort korleis den nye modellen blir, gjeld trafikklyssystemet.