– Eg vil understreke at det er brei semje i Nato, 32 land og også med USA, om å auke trygginga i Arktis, inkludert Grønland, seier statsminister Jonas Gahr Støre.
På ein pressekonferanse søndag ettermiddag sa statsministeren at truslane om toll frå Trump er «uakseptabelt» og at Noreg støttar kongeriket Danmark.
President Donald Trump skreiv laurdag at han ville innføre ein tollsats på 10 prosent på varer frå Noreg og andre Nato-land som har sendt soldatar og militært utstyr til Grønland.
Donald Trump la laurdag ut meldingar om ekstra toll på varer frå Nato-land som støttar Danmark på Grønland.
Grafikk: Skjermdump fra Truth socialTrump hevdar tollsatsen skal auke til 25 prosent frå 1. juni, og skal gjelde til USA har fått ein avtale om å kjøpe Grønland.
Etter at trusselen om toll kom i går, hadde Støre kontakt med partar i nærings- og arbeidslivet.
– Vi forstår at denne meldinga om auka toll på eksport i USA, som enno ikkje har tredd i kraft, skaper usikkerheit.
Høyr pressekonferansen med Jonas Gahr Støre her.
Støre sa ikkje at han meiner Noreg skal svare på ein eventuell toll med toll.
Ser til andre marknadar
Tidlegare i dag brukte næringsminister Cecilie Myrseth (Ap) ein liknande ordlyd:
– Truslar er ikkje akseptabelt. Det høyrer på ingen måte heime blant allierte, sa ho til NRK.
I fjor sommar la USA 15 prosent toll på norske varer. Det er for tidleg å vite korleis 10 prosent ekstra straffetoll frå USA vil påverke norsk næringsliv, peikar Myrseth på.
Cecilie Myseth
Likevel er arbeidet allereie begynt med å sjå til alternative handelspartnarar når USA gjer som dei gjer.
– Vi har signert ein avtale med India fordi vi er nøydde til å halde fram arbeidet med å bidra til at vi har marknadar der ein kan levere.
Dette må du vite om toll
- Kva er toll?
Toll er ei avgift staten legg på varer som kjem inn i landet.
Noreg krev for eksempel toll på ost som blir importert frå utlandet. Det gjer at ost frå utlandet kostar meir her heime, samanlikna med ost frå norske produsentar
Kjelde: Regjeringa/Store norske leksikon
- Korleis fungerer det?
Det er bedrifta eller personen som importerer vara, som betaler tollen. Det skjer når vara passerer grensa.
Inntektene frå tollen går til landet som har ilagt han.
Sidan det då kostar meir å selje ei vare, kan ei bedrift sette opp prisen på produktet for å dekke inn kostnaden av tollen.
Slik kan kostnaden av toll gå ut over forbrukarane.
- Kva er formålet?
Spesielt to argument for toll blir trekt fram:
- Styrking av eigne bedrifter mot konkurranse frå utlandet
- Inntekter til staten
Toll gjer at utanlandske varer blir dyrare for forbrukarane i landet dei blir importerte til. Ved å gjere desse varene dyrare, kan staten håpe at folk heller vil kjøpe lokale produkt.
Nokon meiner dermed at toll på importerte varer kan verne eit land sine eigne bedrifter mot konkurranse frå utlandet.
Og sidan toll i praksis gir staten ekstra kroner for ei vare som blir sendt over grensa, meiner nokon at dette vil gi staten meir inntekter.
Donald Trump drar også fram eit tredje argument, nemleg å bruke toll som eit forhandlingskort eller pressmiddel.
Meiner det er alvor no
Blant næringane som vil kunne bli ramma av ytterlegare toll, er fiskerinæringa. USA er ein viktig marknad for norsk fisk. No begynner det å bli alvor, seier administrerande direktør i fiskerikonsernet Nergård, Tommy Torvanger.
– Det er alvor no, altså. Det er det som er min reaksjon. Ein kan ikkje berre halde på med handelsavtalar. Spelet er blitt større og regelboka er kasta ut vindauget.
Næringslivsleiar Tommy Torvanger
Han seier ekstra toll vil føre til at det blir vanskelegare for dei å få selt varene i den amerikanske marknaden.
– Det betyr redusert verdi av dei varene vi har. Det kan vere store konsekvensar. Vi må ut og leite etter andre marknadar der vi kan selje desse varene.
Tommy Torvanger er administrerande direktør i Nergård-gruppa som blant anna eksporterer sjømat til USA.
Foto: Dan Henrik KlausenMen han trur ikkje at det blir aktuelt å droppe den amerikanske marknaden heilt.
– Det ser eg ikkje føre meg at vi gjer. Noreg og USA er to land som har hatt veldig tett samarbeid og dialog i fleire tiår. Så at det skal skjere seg slik, håper eg ikkje skjer.
Skaper uvisse
Trusselen om toll har skapt skarpe reaksjonar. Både statsminister Jonas Gahr Støre og utanriksminister Espen Barth Eide var ute laurdag kveld og avviste utspelet, og kalla det uakseptabelt.
Administrerande direktør i Norsk Industri, Harald Solberg, kallar framgangsmåten til Trump for «tolltrusseldiplomati».
– Dette understrekar at vi også i 2026 må forhalde oss til stor usikkerheit og raske endringar.
Harald Solberg
- Administrerande direktør, Norsk industri
Solberg seier det er tydeleg at Trump vil bruke alle verktøya han har for å få det som han sjølv vil ha.
– Denne nyheita bidreg heilt klart til å auke både frustrasjonen og usikkerheita, seier han.
Sjeføkonom Harald Magnus Andreassen i SB1 Markets meiner utspelet er fullstendig utanfor, og at dette er ein politikk som kan slå tilbake på Trump og populariteten hans i USA.
– Tolltullet til Trump rammar amerikanske forbrukarar. Difor har prisane auka i USA, seier han.
Meiner Europa må svare
EU-president Ursula von der Leyen seier i ei fråsegn at toll vil undergrave det transatlantiske forholdet.
– Vi risikerer ein farleg nedgåande spiral, seier ho om trusselen frå Trump.
Tidlegare toppdiplomat og no rådgjevar i Kruse Larsen, Kåre Aas, meiner Europa må svare, og seier det er bra at mange europeiske leiarar allereie har vore ute og sagt at dette ikkje er akseptabelt.
– Det er eit viktig signal til Trump-administrasjonen, men i aller høgaste grad også til amerikansk næringsliv og amerikanske politikarar.
Tidlegare ambassadør til USA og Israel snakkar om Trumps nye tollsatsar
Det er likevel ikkje nok, meiner Aas.
– Ein må gå eitt steg vidare. Då må ein sjå på om ein skal komma med tilsvarande tiltak overfor amerikansk næringsliv, som eksporterer til dømes til Europa, seier Aas, men peikar på at Trump i så fall vil svara på dette.
Publisert 18.01.2026, kl. 09.11 Oppdatert 19.01.2026, kl. 10.25
English (US)