Store mengder snø i Bergen: Trøbbel for Heimetenesta

– Eg brukar lang tid på å komme fram til pasientane, seier Sharon Saldivar i Heimetenesta i Bergen

Fredag tok det 30 minutt å komme fram til ein pasient, mens det til vanleg tar 10 minutt.

I tillegg er det krevjande for tilsette å komme seg til jobben.

– Vi har dobbeltarbeid no, seier Saldivar.

Heimetenesta får mange telefonar frå bekymra folk som ventar på dei.

Kollega Solveig Hodneland ber folk besøke naboen for å høyre om alt går bra, no som det er store forseinkingar.

– Ring på og høyr om heimetenesta har komme i dag eller ikkje. For det har blitt veldig mykje forseinkingar i det siste.

Ber folk vere rause

Kommunen jobbar med å få tak i bilar med firehjulsdrift, melde dei fredag.

Også kommunar rundt Bergen har meldt om problem for heimetenesta.

– Er det heilt umogleg for oss å komme oss fram til husa, ver raus og la oss få stå parkert litt knotete til ein liten stund, skriv Askøy på si nettside.

Snøvêret har skapt trøbbel for fleire laurdag.

I Bergen er det full stans i Bybanen på grunn av snøen.

På Flesland har rullebanen vore stengt i to periodar på 20 minutt grunna snøbrøyting. Både i Bergen og Stavanger

Alle helikopteravgangane til Equinor sine plattformer, er innstilt inntil vidare.

Vegvesen og politi har meldt om fleire ulykker i løpet av natta, men ingen er alvorleg skadd.

Skred-isolerte bygder

Snøskredfaren er også stor på Nordvestlandet. Fem bygder er heilt isolerte på grunn av ras eller fare for ras.

I Sogn og Fjordane gjeld det Oldedalen og Lodalen i Stryn kommune og Navelsaker i Stad kommune.

I Møre og Romsdal er Bjørke i Volda isolert på grunn av skredfare. I tillegg er den kommunale vegen gjennom Standaldalen i Ørsta stengd på grunn av eit snøskred ved Storebrua.

Røde Kors har åtvara skifolk om å vere veldig forsiktige i helga.

Råda frå Vegvesen og politi bør vere godt kjende: Ta ekstra tid og køyr etter forhalda.