Stor auke i talet på redningsaksjonar for Røde Kors i sommar

Frå 1. juni til 6. august rykte Røde Kors sitt hjelpekorps ut til 427 redningsaksjonar, det høgaste talet på fem år. Til samanlikning var talet 360 i same periode i fjor.

Årsaka er vêret, meiner nestleiar i Landsråd hjelpekorps, Roy Worum.

– Vi har hatt ein eksepsjonelt fin sommar over heile landet. Mange har vore ute i naturen, og då skjer det òg fleire ulukker. I fjor var sommarvêret dårleg, og det var færre leiteaksjonar.

Stader med mange turistar, som Lofoten og Møre og Romsdal, har hatt mest å gjere.

– Dei fleste turistane er godt førebudde, men nokre overvurderer seg sjølve for å få det perfekte Instagram-biletet, og kunne vore betre førebudde, seier Worum.

Dramatiske hendingar

Men mange, både nordmenn og utlendingar, har vore uheldige. I løpet av berre ei veke i juli fekk fem utanlandske turistar hjelp etter å ha gått seg bort i Eidfjord, medan ei kvinne i Aurland blei redda opp frå ei elv med skadar.

Ein person vart funne nedkjølt i Ullensvang. I Jotunheimen omkom to turgåarar. I Eidfjord måtte òg ein turist få hjelp etter at teltet blei fylt med regn.

Ein av dei mest dramatiske var leiteaksjonen etter amerikanaren Alec Luhn som blei funnen i live i Hardanger etter mange dagar i fjellet:

– Gjer det norske samfunnet rikare

Redningstenesta i Noreg er i stor grad avhengig av frivillig innsats og frivillige organisasjonar. Politimeister i Møre og Romsdal rosar innsatsen til dei frivillige:

– Det finst knapt eit betre bilete på ein kvardagshelt. Dei ofrar fritid og helse for å redde andre. Dei gjer det norske samfunnet rikare, seier Ingar Bøen.

Dramatiske døgn i Rauma

Operativ leiar Eirik Lindheim Brastad deltok på aksjonen der ein nederlendar vart funnen i live etter fleire døgn i fjellet i Rauma. Tåke og dårleg vêr gjorde leitinga krevjande.

– Det er heilt fantastisk når nokon blir funne i live. Det gir motivasjon til alle som deltek, seier Brastad, som meiner Trollstigen-aksjonen er den mest spesielle han har vore med på.

Ofte tragiske utfall

Ifølgje Trond Inge Larsgård, leiar for varslingsgruppa i Møre og Romsdal, endar mange søk etter sakna med funn av omkomne.

– Difor gir historiene om amerikanaren som blei funnen i live i Hardanger og nederlendaren i Trollstigen ekstra inspirasjon. Dei viser at det framleis er håp, sjølv når tida går – og at vi aldri må gi opp.

Larsgård understrekar at oppdrag med tragisk utfall er like viktige.

– Å finne nokon som er omkomne, kan hindre at barn eller andre tilfeldig finn dei. Det gir òg familien svar.

Stiller opp sjølv om det er ferie

Midt i ferietida stiller dei frivillige opp når alarmen går, sjølv om det krev at dei må skaffe barnevakt eller reise frå jobb utan å få dekt tapt inntekt.

– Mange bruker ferien sin til å hjelpe til i aksjonar, og bidreg òg frå feriestaden. Viljen blant dei frivillige er enorm, og det er den som gjer at redningstenesta fungerer så godt, seier Larsgård.

Beredskapen har vore god i sommar, men Worum seier dei kan måtte rekruttere fleire dersom oppdraga aukar. Han ser òg ein positiv trend:

– Mange turistar er betre førebudde og godt utstyrte for norsk natur enn før.

– Gjer noko med deg

For Larsgård er redningsarbeidet òg ein måte å gi noko tilbake til samfunnet på. Han hugsar alle aksjonane han har vore med på, men nokre oppdrag set ekstra djupe spor.

– Når det er barn involvert, gjer det noko med deg. Eg hugsar særleg då eit barn forsvann i elva i Geiranger og omkom. Heldigvis er slike hendingar sjeldne.