Stengjer skulen grunna kulda: – Sat langt inne

Såpass kaldt er det i Os nord i Østerdalen torsdag at dei held barne- og ungdomsskulen stengd.

– I dag har vi bestemt å stenge skulen på Os, fordi vi ikkje får opp tilfredsstillande temperatur i klasseromma og får ikkje ventilasjonsanlegget til å fungere optimalt, seier kommunedirektør i Os Marit Gilleberg.

Det betyr at rundt 150 barne- og ungdomsskuleelevar ved skulen er heime torsdag.

– Det sat langt inne. Vi diskuterte fleire alternativ, seier ho.

Den stengde skulen vart først omtala av Arbeidets Rett.

Kaldaste januar på lenge

Det ser ut til å bli den kaldaste januar sidan 2010, både i Innlandet og nasjonalt. Det opplyser vakthavande meteorolog Bente Wahl.

Det kan bli svært låge temperaturar i både Folldal i Innlandet og Røros i Trøndelag. Begge fekk sin lågaste temperatur så langt i år, i natt.

Heile januar har vore temmeleg kjølig begge stadar, ifølgje meteorologen. Folldal ligg 8,5 gradar under normalen for januar, og Røros er på 6,7 under normalen.

– Det er ganske ekstremt, vil eg si.

Landets lågaste temperatur i natt var òg i Folldal, som var nede på 39 minusgradar. På Røros var dei nede i 37,5 minusgradar, og i Osmoen i Os 37 minus.

Og det kan bli endå kjøligare, åtvarar meteorologen.

– Ein skal ikkje sjå bort ifrå at det kan bli endå kaldare i dagane som kjem.

Her kan du sjå kor det er kaldast no:

• Lurar du på kva du kan gjere i kulda? Her får du fleire tips.

Bygger ny skule

I desse dager held dei på og byggjer ny skule i Os.

I det gamle bygget kan dei få problem når temperaturane blir låge nok. Som i dag. Verneombod og leiinga ved skulen vurderte at dei no ikkje fekk til høg nok temperatur i skulebygget, og at dei derfor måtte stengje skulen.

– Det var sett inn masse vifteomnar men då bles jo berre sikringa, så det kunne vi ikkje basere oss på.

– Vi har fyrt for kråka i mange år, så no bygger vi ny skule og får betre ventilasjon og energistyring i bygget.

Dei vil ta ei ny vurdering i løpet av torsdagen når det gjeld om dei må stengje skulen fredag òg.

– Kva gjer elevane og lærarane i dag?

– Berar ved og fyrar, vil eg tru, seier ho og peikar på dei låge temperaturane.

– Foreldre og ungar må vere kreative i dag, dei kan både jobbe med skulearbeid og bere ved.

• Les òg: Slik blir vintervêret framover.

Vand med låge temperaturar

Lufthavnsjef ved Røros lufthavn Gudbrand Rognes opplyser på sms at dei er godt vand med låge temperaturar på Røros.

– Men det riv litt i nasen i dag.

Rundt halv ti opplyser han at morgongavgangen mot Oslo nettopp gjekk, to timar forseinka. Kulda var årsaka til forseinkinga.

– Ved så låge temperaturar må ein halde fokus på å unngå skadar på vannrøyr, bygg, kjøretøy osv.