Står i kø for Håkon (19): – Det eksploderer

– Livet er herleg slik som det er nå, eg trivast, seier Håkon Moe Berg da NRK møter han på Trondheim Stadion få dagar etter bragda.

Og nå er det mange som vil ha tak i supertalentet. Telefonen til trenaren går varm.

– Det eksploderer. Kort fortalt.

Det fortel Håkon Moe Berg sin trenar i Team Trøndelag Erik Sakshaug om interessa for 19-åringen til NRK. Han utfører trenarplikta saman med bror sin, Ola Sakshaug, på laget.

Det var onsdag kveld førre veke at Håkon Moe Berg sprang inn til fantastiske 3:30,28 på 1500 meter under eit stemne i Tyskland.

Med det klarte han kravet til VM i Tokyo i september.

Harejobb som løn

Trass i supertida og at han nå er VM-klar, måtte han tysdag kveld stille opp som hare, eller fartshaldar om du vil, for resten av lagkompisane i Team Trøndelag.

Dette fordi resten av laget ville avslutte sesongen med å prøve å sette nye personlege rekordar.

– Eg får jo såpass mykje att for å vere i miljøet mitt her i Trondheim. Så det er godt å gje tilbake. Nå kan eg både gje til fellesskapet, men også bidra til noko veldig konkret med å bidra til gode tider for dei.

Etter løpet kunne lagkompis Magnus Øyen tilfreds slå fast at det vart ny personleg rekord på 3.41 med superharen Berg i front.

– Godkjent harejobb. For meg vart det «pers» med 3.41,08. Så det var perfekt, seier Magnus Øyen i Team Trøndelag om haren med personleg rekord på 3.30,28.

– Trondheim, «that's it»

Nå skal 19-åringen med den 16. beste tida på 1500 meter i verda dette året, førebu seg til VM i Tokyo i september.

Dit reiser han kanskje også med sin fyrste sponsor.

For etter 3.30-prestasjonen, så ringes trenaren ned, og utstyrsleverandørane står i kø for signere ungguten, fortel Sakshaug.

– Håkon har jo aldri hatt ein sponsor, han har aldri hatt ein skoavtale. Han har aldri trena i høgda. Vi har berre trena i Trondheim, «that's it», seier Team Trøndelags trenarbror, nummer to: Ola Sakshaug til NRK.

– Bror min, Erik, sit i telefon heile dagen.

Broren, Erik Sakshaug altså, bekreftar telefonstormen.

– Det er meir eller mindre alle utstyrsleverandørane som er interessert i å få ein utøvar på kroken.

– Kva er det du da jobbar med?

– Det er jo å ha litt is i magen. Tenkje seg nøye om i forhold til kva Håkon sjølv ynskjer eigentleg. Korleis type avtale han vil ha, kor lang ho skal vere. Det er ein rekkje ting ein må tenkje gjennom i ein slik prosess da, seier Erik Sakshaug.

Han fortel at dei med vilje ikkje har forhandla fram nokon type kontraktar for nokon av utøvarane i Team Trøndelag til no. Dette for å vere i god posisjon til augneblink som no. Målet er også at ei avtale skal gagne heile Team Trøndelag i tillegg til kometen Håkon Moe Berg.

Innboks-rekord

Løpet til Håkon Moe Berg har også sett spor av seg rundt omkring i friidrettsverda. På delingsplattforma X skriv den kjende friidrettsjournalisten Jonathan Gault at Berg sin prestasjon førte til stort trykk i hans innboks også.

– Eg har fått fleire tekstmeldingar/e-postar om denne prestasjonen den siste timen enn for noko anna løp i år, sett bort frå 800 meter-finale i USA, skriv Gault.

Til NRK greier Gault ut om kvifor han trur kometen frå Noreg begeistrar.

– Eg trur friidrettsfolk elskar tenåringsfenomen. Likevel så er det eit par ting med Håkon Moe Berg som gjer at han står ut, seier Gault og held fram:

– For det fyrste er han norsk. Eg trur folk finn det utruleg ta eit så lite land kan produsere nok ein tenåringssensasjon på 1500 meter så raskt etter Jakob Ingebrigtsen. Det andre er måten han sprang 3:30-løpet sitt på, seier Gault.

Han fyller ut med å beskrive kor stor styrke 19-åringen frå Kyrksæterøra viste da han sette opp farten på sisterunden, og kor uredd ungguten var mot dei eldre konkurrentane.

Håkon Moe Berg sjølv håpar han nå er komen for å bli i friidrettstoppen.

– Det er artig at folk legg merke til det eg gjer. Det er klart at vi har tradisjon for å vere gode på øvingar som 1500 meter nå. Det skal vere mogleg, med erfaringa og kompetansen vi har, å halde nivået over tid. Eg håpar eg er komen for å bli, seier Berg til NRK.

VM er bonus

Etter superløpet som Narve Gilje Nordås vann få hundredelar framfor Berg, så er ungguten altså klar for verdsmeisterskapen i Tokyo som går føre seg frå 13. til 21. september.

Det kjem litt overraskande på.

– Det blir jo ein litt lenger sesong enn kva vi hadde sett for oss, seier Sakshaug, men held fram:

– Vi må berre forlenge sesongen med ein månads tid da. Vi hadde det jo i bakhovudet at dette kunne skje, men han toppa jo på ein måte forma til NM og U20-EM tidlegare i august. Så nå blir VM ein bonus, men så god som han er no, så trur eg at han kan bite frå seg.

Håkon Moe Berg sjølv kan ikkje vente til VM startar.

– Kanskje halvparten av dei som spring 1500 meter i VM er medaljekandidat. Det er sinnssykt jamt i toppen, så alt kan skje. Ingenting er umogleg, seier ein blidspent Håkon Moe Berg.

VM i friidrett følgje du på NRK sine plattformer frå 13. til 21. september.