Person pågripen etter truleg skyteepisode i Stavanger

Hendinga skjedde i Hinna bydel i Stavanger onsdag morgon. Politiet melder at dei har kontroll på staden.

Naudetatane rykte ut til adressa etter ei melding om ein mogleg valds- eller trusselsituasjon rett etter klokka 08.

– Vi jobbar med å få full oversikt over hendinga. Den fornærma blir behandla av ambulanse og lege på staden, men skadane verkar ikkje som alvorlege, skriv Victor Fenne-Jensen i Sør-Vest politidistrikt i ei melding til pressa.

Politiet opplyser at hendinga var pågåande då dei først fekk meldinga, men at dei nå har kontroll på staden. Det er stadfesta at ein person er pågripen i samband med hendinga.

– Vi utfører no vitneavhøyr og åstadundersøking på staden, legg Fenne-Jensen til.

Det er førebels uklart kva som er bakgrunnen for hendinga.

Politiet har tidlegare opplyst at den skadde personen truleg vart skoten med eit luftvåpen. Den skadde får behandling på Stavanger universitetssjukehus (SUS), opplyser politiet klokka 09.

Den arresterte personen blir avhøyrd, og vedkommande kjem til å bli sett i arrest seinare onsdag.